小記有個老友係周星馳死硬派Fans，除咗周星馳啲戲，其餘大部份有彈無讚，但有日佢居然走埋嚟同我講，話《反斗車王》勁好睇，當時已經覺得有啲奇怪，碰啱近排《反斗車王》DVD出咗，於是問發行攞咗隻嚟睇，一睇之下，果然同星爺套《食神》劇情有啲相似喎！
記者：周達之
學星爺玩伸脷
《反斗車王》故事係講述準備參加洲際盃大賽嘅新晉車神閃電王麥坤，一直恃才傲慢、目中無人，一次意外流落到66號公路嘅「打冷鎮」，喺呢個被人遺忘嘅小鎮內，嘗盡苦頭嘅同時又結識到一班地踎朋友，從而搵到比名譽獎項更重要嘅友情同愛情，亦了解到獎盃只係一隻無價值嘅空盃。咦？咁咪同《食神》裏面狗眼看人低嘅史提芬周流落大牌檔，認識一班地踎流氓，最後悟出人生真諦、了解食神之名只係虛銜嘅橋段一模一樣？難怪連星爺Fans都大讚好睇喇，原來愛屋及烏！
《反斗車王》其實上個禮拜已經有貨落場，不過數目唔多，唔係間間舖頭都有，而且廸士尼+Pixar出品嘅動畫啱晒一家大細睇，一出已經俾「眼利」人士掃晒，所以出咗都唔係好覺。而今個禮拜有大量貨到，兼且送多款贈品，簡直係本周必買！
Bonus碟賣「人情」
電腦動畫發展到𠵱家已經無乜視覺效果做唔到，畫面幾靚都再冇驚喜，所以BonusTrack裏面隻字不提製作過程，改為Sell人間有情，其中一段係講《反斗車王》嘅製作靈感，原來劇中「打冷鎮」所處嘅66號公路係真有其「路」，係以前由芝加哥到洛杉磯的主要公路，但正如劇中所講，人人都為慳十分鐘車程而改用新建嘅洲際公路，令66號公路漸被遺忘，路旁小鎮亦由繁華變衰落，風光不再。導演JohnLasseter得作家MichaelWallis推介而到66號走了一轉，發覺路程雖然迂迴，但就可令人放慢腳步思考，感受細膩風土，從而領悟出人生雖然可以為拼搏而拼搏，但有比名利更重要嘅友情和親情。係咪好有意思呢！
BonusTrack另外仲有一段用哨牙嘜做主角的短片、一首從劇中出現過的MTV，同埋一段同《反斗車王》無關、唔睇又咁，睇咗又唔會High嘅短片。
爆笑位逐格睇
《反斗車王》成套片可以話係冇悶場，由頭到尾一氣呵成，無廁所位，而必睇位就多不勝數，不過因為版面有限，只能精選介紹四個。
連環撞車
賽車場上最令人擔心肉緊的場面莫過於撞車，《反斗車王》一開始已經來個四十車連環大相撞，緊張到心都跳埋出嚟！
伸脷衝線
自信爆棚嘅麥坤唔肯換胎，結果兩條尾胎爆晒，差啲俾車王同磁力霸追上，好彩麥坤伸脷衝線，最後保住三冠軍賽果，可以擇日重賽。呢段單睇麥坤個勁狼狽樣已經超爆笑。
成階下囚
麥坤準備參加重賽途中，不幸喺運輸車裏面跌咗出嚟，最後仲因為超速被警車追捕，一輪橫衝直撞嘅爆笑追捕戰中，麥坤流落打冷鎮，更成為階下囚，真係衰到貼地。
有情有義
除了爆笑，《反斗車王》亦有不少感人場面，最後一場洲際盃賽中，麥坤放棄十拿九穩嘅冠軍資格走去扶撞到散晒嘅車王完成比賽，輸掉冠軍但贏得全世界掌聲，場面十分感人。
