由香港藝術發展局主辦嘅世界級戶外媒體藝術展覽「体．映．戲」（BodyMoviesInHongKong），由即日起至19日喺尖沙嘴星光大道舉行，呢個活動係民政事務局舉辦嘅2006年「亞洲文化合作論壇」其中一項節目。
杜琪峯呢輪除咗忙拍《神探》，又要幫藝術發展局推動鮮浪潮短片競賽同媒體藝術發展，前晚佢又搵埋劉德華去咗尖沙嘴出席「体．映．戲」開幕禮，華仔話：「『体．映．戲』其實係透過投影，將參與者嘅剪影投射到外牆，製造出唔同嘅互動效果。外國有唔少電影同MV都有利用呢種媒體藝術。」
望政府出力推廣
問華仔敢唔敢喺演唱會度引用投影技術做出裸體效果？佢話：「點解唔敢？呢個都係藝術一種，可以試吓！不過我知價錢好貴，除非政府批我做20場演唱會，唔係就唔夠製作費做。」
杜琪峯就話呢個展覽好值得推廣畀市民睇，因為係著名嘅國際媒體藝術家RafaelLozano-Hemmer嘅精心傑作，𠵱家嚟香港做展覽，佢都有抽時間去睇，杜琪峯話：「香港對媒體藝術只係處於發展雛形，我諗政府仲要出力去推動，希望有朝能夠普及。」
另外，勇奪威尼斯影展金獅獎嘅電影《三峽好人》前晚喺IFC首映，杜琪峯都有去捧場，導演賈樟柯話香港係全世界第一個公演《三》嘅地方，好希望大家捧場。有人問賈大導想同邊個香港導演合作，佢就話杜琪峯係佢心儀已久嘅導演，佢哋兩個一見到面時，仲即刻肉緊到握手擁抱㖭。
