劉德華感受氣氛
「我最希望Usher嚟香港開演唱會，因為我覺得佢嘅表演真係冇得頂，佢每隻CD我都會買，甚至係佢每個騷嘅DVD我都有收藏。我認為一場好睇嘅表演，除咗個歌手要唱得好，現場氣氛都好重要，睇Usher嘅表演就清楚乜嘢叫氣氛熱烈啦。」
最想睇外星：Usher
古巨基深受感染
「我好希望平井堅可以嚟香港開演唱會，因為我好欣賞呢一位日本歌手，佢把聲線好獨特，厚得嚟又好響亮。同埋我覺得一個歌手唱歌最重要係要有感染力，不論你把聲幾好聽、唱得幾咁勁都好，一定要有感染力。平井堅就係一個唱得好之餘又有感染力嘅歌手，所以佢嚟香港開演唱會的話，我必定會捧場。」
最想睇外星：平井堅
陳奕迅從中偷師
「上次麥當娜做亞洲巡迴又唔嚟香港開，佢喺大阪同東京站開騷時，我咁啱又有嘢做去唔到睇，好可惜。我未睇過佢嘅演唱會，好想睇一次，只要佢一日未退出，無論點都要睇一次。我好欣賞佢嘅sexy，佢好有才華，最重要係幫佢做騷嘅班底係世界級，希望睇完可以從中學到嘢。」
最想睇外星：麥當娜（Madonna）
吳家樂追捧木村
「我最想SMAP嚟香港開演唱會，因為我好鍾意木村，又從來冇機會見佢真人，佢主演嘅日劇我大部份都睇過，覺得佢真係任何角色都演到，要佢型又得、man又得，甚至扮鬼扮馬都好令人受落，SMAP呢隊組合個個成員都好掂，如果佢哋嚟香港開演唱會，我一定會撲飛睇。」
最想睇外星：SMAP
鄭融唔想退飛
「上次瑪麗嘉兒取消香港站演唱會，點都想佢嚟開番一次，本來我都買咗飛，而張敬軒都買咗4,800蚊嘅飛，點知佢臨時有嘢做，送咗畀我，不過我𠵱家啲飛都未退番錢。我未入行已經好鍾意瑪麗嘉兒嘅風格，其實每逢有外國巨星嚟香港開騷，都係好難得，點都要去睇吓學吓嘢。」
最想睇外星：瑪麗嘉兒（MariahCarey）
李亞男錯過後悔
「我好鍾意CelineDion，學生時代已經好鍾意聽佢，佢唱歌真係好好聽，我好希望佢嚟香港開，香港好多人鍾意佢，之前佢喺溫哥華開演唱會，可惜我錯過咗，如果佢嚟香港我一定會捧場，唔知佢仲會唔會做巡迴呢？」
最想睇外星：CelineDion
向海嵐華麗之始
「我最想中森明菜嚟香港開演唱會，前排佢都好似開過巡迴演唱會，又聽講佢好似就嚟唔唱。我好細個就聽佢啲歌，都有買佢嘅唱片，覺得佢唱功好之餘，跳舞都好型。雖然𠵱家睇番佢以前嘅形象有啲娘，不過嗰個年代係好華麗，佢其中一首歌叫《爛破船》，梅艷芳都有翻唱過，我都好鍾意呢首歌。」
最想睇外星：中森明菜
陳苑淇模仿對象
「我最想Beyonce嚟香港開演唱會，因為我好欣賞佢，佢唱歌又好，跳舞又勁，而且睇過佢喺電視上表演，佢真係跳得好犀利，又好識搞氣氛，佢喺我心目中簡直係superstar，要做到佢咁睇得、唱得同跳得，先可以話係成功嘅歌手，佢好似嚟緊會去台灣開演唱會，都好想飛去睇。」
最想睇外星：BeyonceKnowles
採訪：馬建華、李珮洳、楊潔雯、駱華齡、卓美娟
