過去一個星期，恒指高位震盪，但係股票炒得都幾瘋狂，尤其中字派，幾乎只要有少少消息就可以將股價大幅推高，短時間內股價升30%至40%係等閒事。根據街頭散戶智慧，炒完大價股炒落後股，好快就輪到其他未升過嘅二三線股。
要捉呢類股票，最緊要係要知道風險所在，尤其係仙股同創業板股，風險大嘅股票注碼就一定要細。通常散戶都會睇圖炒呢類股票，亦係最多人用嘅方法，有幾好用？問一問炒到發達嘅圖表派就知。
但係炒二三線好易中圖表陷阱，所以，至少要識番兩招財務分析招數。最基本係唔好淨係睇股價，仲要睇埋市值，唔少股價細細嘅神仙股，但市值數以十億計，呢類股仔由1億炒上幾億唔算太難，但係由幾十億再炒上，難度好高。
除咗業績、PE、P/B等基本數據外，投資者唔好忘記睇埋公司集資往績，如果經常股價一炒高就集資，或者用供股呢招收番散咗出去嘅街貨，呢類股票就算有幾好消息都要諗諗先。
勤睇通告有收穫
其實要搵好股票，除咗花時間睇財務報表，留意世界大事外，仲有一個發掘方法係每日上網睇交易所網站的上市通告，尤其係睇睇有乜公司復牌，重大交易等等，好多時歐陽風都係透過通告搵出可炒股票。不過，通告文字沉悶兼好多時語句雜亂，要有好強烈「發掘」股票嘅意欲，至會有心機睇。
歐陽風