法國女星蘇菲瑪素（SophieMarceau）早幾日專程嚟香港出席珠寶名牌Chaumet開幕禮，前日佢興奮剪綵後，夜晚就換咗套粉紅色雪紡低胸衫配緊身黑皮褲，出席私人晚宴同派對，佢一見傳媒就非常high，再次成龍上身，不停做V字勝利手勢，又表情多多，幾次咬唇，可惜就唔肯再做訪問，快步閃入派對會場。
萬寶寶SM味重
前晚城中名媛好似何超瓊、何超儀、林建岳女友Monica、葉梁美蘭，都盛裝出席爭睹蘇菲瑪素風采，女嘉賓則以低胸迎戰呢份法國過江龍，當中以榮雪梅同全國人大前委員長萬里孫女萬寶寶最具戰鬥力。榮雪梅一件黑色喱士裙，全晚不停跌膊，跌完又拉，拉完又跌，最後索性任得件衫變成露肩款式；而萬寶寶嘅Corset配熱褲，就充滿SM味道。
此外，久未露面嘅顏思穎，𠵱家喺香港大學修讀緊法律系，早前佢被雜誌拍到喺Volar攬仔，佢就話：「嗰個係我男朋友，係香港人，我哋啱啱開始，我仲咁後生，點會結婚住？」
