互聯網專家W請食飯，夠晒客氣，去福記飲茶，先叫點心，後點小菜。今時今日，所有點心嘅原材料之中，十居其八都有鮮蝦成份，莫講蝦餃，即使燒賣、春卷、粉果等等都有蝦在內。專家Ｗ話佢自去年開始，發覺對蝦蟹敏感，最近發覺對魚都敏感，所以唔再食得魚蝦蟹蠔帶子鮑魚！戒口戒得好清，我哋唔多信，專家W舉起隻中指，指甲對下果然紅腫有微粒，一望而知係皮膚敏感迹象。專家W話係前幾日老闆請夥計食大閘蟹，佢唔食得，眼光光，眾人叫佢試吓食魚啦，佢肚餓難忍，諗住偶然食一次魚，唔怕啩，於是食咗半條，點知第二朝起身，隻中指就出事，真係靈過鬼。
專家W直至三年前，無海鮮不歡，唔鍾意食肉。𠵱家呢，唯有食菜食雞，其餘盡量避免。大編輯轉行去大學打工之後，原來亦有此症，大家坐埋，一於唔食海鮮，係唔係我哋以前食蝦蟹（貝殼類海產）太多，已食滿一生之配額，所以今日唔食得呢？專家W好年輕啫喎，咁快就唔食得魚蝦蟹，未免可惜。記得自然療法專家披圖梁講過，現時愈來愈多人對貝殼類海產敏感，一個有可能嘅原因，係與海洋污染，海產含金屬有關，我哋食咗啲海鮮，間接將重金屬輸入身體內，影響胰臟運作所致。如此說屬實，對海鮮敏感嘅人士，勢將有增無減，波及海鮮生意。
左丁山已經好耐冇食蝦蟹，但因為坊間食譜關係，好難百分之一百斷絕（例如大人物請吃晚飯，以濃味龍蝦湯為頭盤，好難話唔飲啫），自己注意到唔少老年長者，好容易皮膚痕癢，唔捨得唔食龍蝦、蝦碌，但一食完就會身痕，好辛苦，奉勸各位為人子女者，唔好因為孝順而任意點菜，畀蝦蟹嚟引誘老人家也，真正孝順嘅方法係每當食飯時，席上有長者在，盡量不食蝦蟹，以免引誘長者。此話說易行難，其實都係講吓嘅啫。