發展商近年賣樓，愈嚟愈識玩包裝，尤其特別注重會所設施，對於單位嘅間隔、實用率、用料、景觀同地段等，買家最切身嘅問題，往往輕輕帶過就算，似賣會所多過賣單位。有意置業嘅買家，不妨參考吓《Uwantsforum》網站「香港好的地產發展商」選舉，睇吓班網民點揀。
呢個投票共有8間發展商榜上有名，得票最多嘅係新鴻基地產，共得56票，佔近42%；第2位係長實，有32票；季軍係太古，有23票；恒基有7票排第4，信和同新世界各有4票，華懋同南豐包尾，分別有3票同兩票。
豬Bee話：「覺得信和嘅售後服務好好，樓嘅用料都一流。」cartoonmandy就大唱反調：「信和差到不得了，實用率低，用料差、設計又唔掂。只係識得用包裝，什麼clubhouse、northpoint信和個成名屋苑寶馬山花園，就係好例子，1000呎，實用率only五成，無工人房，主人房都係得60平方呎，間屋中間仲會漏水!」
住緊新地樓嘅adonis就大讚：「SHK，人地QC真係做得好好，我而家都係住緊SHK樓，SOFARSOGOOD。」cystanley總結咗幾間發展商：「新鴻基係品質保證、長和系就贏景觀，以上係個人意見，其他發展商冇咩特別印象。」
新地對於當選為網民心目中最好嘅地產發展商，公關有以下回應：「新地一直努力建設，貫徹以客為先的宗旨，以最誠懇及嚴謹的態度為客戶提供最優質的產品和服務......新地將繼續秉承『以心建家』精神......務求為置業者締造最理想家園。」
