關於空軍戰機嘅電影，通常只有男人先會有興趣，但將於本月16日上映嘅《傲氣藍天》（FlyBoys），唔單止動用前所未有咁多嘅戰機吸引男性機片迷，仲出動埋荷李活頭號靚仔、有翻版占士甸（JamesDean）之稱嘅占士法蘭高（JamesFranco）於法國小村莊談情說愛，𠱁埋女觀眾入場。 撰文：戶川惇
荷李活新片《傲氣藍天》故事改編自真人真事，以第一次世界大戰（WWI）法國精英青年軍「LafayetteEscadrille飛行小隊」嘅戰爭故事作藍本。話說1917年，歐洲戰火蔓延，英、法、意組成同盟，熱血青年紛紛自告奮勇投入戰場，與德國陷入生死交戰。惟獨美國隔岸觀火，遲遲不肯加入戰爭，引起美國青年公憤，於是有人自願前往法國加入當地軍隊，佢哋懷住一股傲氣，接受嚴苛嘅訓練，誓要登上戰鬥機同敵人對決。
古董戰機上陣
原來自1930年以來，荷李活已經冇大片商拍過「LafayetteEscadrille飛行小隊」嘅故事，為咗拍攝一齣完美嘅空戰片，今次監製登廸雲（DeanDevlin）同導演東尼標爾（TonyBill）分別喺法國及英國搵嚟多部古董「紐波特17」戰鬥機上陣，再喺美國打造複製品，另外仲用到1909Bleriot、FokkerDR1、SE5等古董戰機，動用飛機數量之多，僅次於1930年上映嘅《地獄天使》（Hell'sAngels）。
法小鎮譜戀曲
影片嘅另一特色，就係劇中人全部有根有據。當年加入飛行隊嘅人來自五湖四海，有機翼折斷仍能安全降落嘅神奇機師CourtneyCampbell、原本係銀行家嘅哈佛生NormanPrince、史上第一位非裔美籍飛行員EugeneBullard等，片中角色全部跟足呢批英雄事迹改編。
不過故事重心就落喺改編自「熱氣球剋星」FrankLuke嘅角色布朗羅林斯上。占士法蘭高飾演嘅呢位將領，不單係成個飛行隊嘅靈魂，片中佢更愛上鄰近小鎮的法國女子露茜安娜，從對方身上體會到戰爭嘅意義同代價。