「皇冠牌」公司嘅新晉姐仔「伊莉沙白」原本事業啱啱有啲起色，但又因為同音樂創作人「陳仔」拍拖後，冇心情做嘢，又唔聽公司話，又唔識點𠱁老細，所以俾公司雪藏。但呢位妹妹仔都幾勁，一般新人俾公司雪，一定會好驚，會想盡辦法𠱁番老闆，但佢就愛情大過天，完全冇驚過，其實呢輪有啲戲都想搵佢做，但皇冠公司梗係唔會幫佢接啦。
苦命阿連向眾友報夢
早排關仁聽到單料，十足靈異檔案，真係信不信由你喇！據講幾年前跳樓自殺嘅女星「阿連」，佢嘅靈位放咗喺荃灣西方寺，重陽節之前，幾個朋友發夢都見到佢，於是約埋一齊去拜吓佢，去到西方寺，竟然見到阿連嘅阿媽喺度裝緊香，佢阿媽仲話：「係咪阿連報夢畀你哋呀？佢都有報夢畀我呀。」啲朋友話淨係記得發夢見到阿連，但唔記得佢講咗啲乜，相信佢應該係放唔低個仔喎！
吹波波兄賣衫唔老實
新紮主持「吹波波」嘅親哥哥「是旦嚟」有間潮流時裝店，賣嘅係貴價貨，一條牛仔褲最低消費1,500蚊。本來時裝嘅嘢，價錢見仁見智，但是旦嚟做生意衰在唔老實。關仁聽朋友講話試過有人喺是旦嚟間舖畀1,000蚊訂條牛仔褲，但幾次去到舖頭都話貨未到，左推右搪後就叫客人揀過第二條，唔可以撻定，最後搞到報警收場。不過最離譜嘅係吹波波落阿哥舖頭攞衫，着住上鏡之後，第日拎返舖頭，是旦嚟叫個店員用蒸氣熨斗「辣」兩下，洗都唔洗就掛上架照賣。嘩！咁唔衞生，真係得人驚，搵鬼幫襯咩？
Textby關仁