由白雪仙帶領嘅雛鳳鳴劇團，喺文化中心演出8場經典粵劇《帝女花》，前晚順利完成，下月會移師演藝學院再演34場。前晚完騷時，仙姐特地上台拖住愛徒龍劍笙（阿刨）同梅雪詩（阿嗲）向觀眾鞠躬致意，之後仲拉隊去洲際酒店慶功，筵開12席，林嘉欣都嚟贈興。
提到下個月嘅飛都賣晒，問仙姐會唔會再加場，佢話：「唔係話加就加，要睇場地，𠵱家都冇戲院，如果要周三都做埋，就要問阿刨頂唔頂得順，我希望劇團每年都有一次演出。」阿刨就唔多願意咁話：「唔知呀。」阿嗲就話：「唔好啦。」有人話仙姐想喎，阿嗲就話：「佢梗係話好，佢恨不得自己做㖭呀。」
讚阿刨聲壯
仙姐一向俾人話偏心錫阿刨，對阿嗲就好嚴厲，前晚適逢阿刨農曆生日，仙姐仲帶大家切蛋糕唱生日歌，佢接受訪問時都只講阿刨，全程冇提過阿嗲，問到仙姐對演出滿唔滿意，佢話：「永遠都唔滿意，好多嘢可以改善，仲可以更好。」不過仙姐就讚阿刨話：「佢割完膽石後，把聲仲壯咗，我唔擔心佢嘅演出，會鼓勵佢。」
不過，原來仙姐喺心入面好錫阿嗲，佢話今次大家演出好辛苦，因為個台好多樓梯，希望演員會習慣，其實阿嗲細個時喺樓梯碌過落地，所以有陰影。阿嗲接受訪問話：「我見到咁多樓梯都腳軟，排嘅時候仙姐特登落地教我點行囉。」
