每逢年尾，又係釣魚季節！去碼頭？海邊？感覺好老人與海啫！其實西貢有啲舊魚排，1個人$120（10人起計）就可釣半日魚兼任食BBQ；在水中央、海天一色，邊睇住個「鹹蛋黃」、再圍爐鹽燒自釣海鮮，同女朋友去真係冧到震！嫌太靜態？加$800，再俾你任玩最新高速水泡、Wakeboard、香蕉船2個鐘！今個11月超反常，仲夏感覺「大加班」！晏晝海面溫度閒閒哋有27至28℃，咁大家又何妨嬉水玩樂一番呢！
記者：朱崇德
攝影：伍慶泉
Model：Maggie、Winki、Stanford
去西貢食海鮮、打Golf，亦可去魚排釣魚！朋友介紹有個「白沙灣魚場水上活動」；30年老排、勁多魚釣；一向多關照熟客，勝在未開發！其實白沙灣係上船嘅碼頭，排主會親自揸快艇載你上排，「正確位置係麻南笏！」究竟喺邊？唔多知！但同白沙灣碼頭只是10分鐘船程，抵埗只見十多個魚排散列，三面環山而抱，正對出是公海，超級遠離煩囂兼有度假Feel！
西貢有個馬爾代夫
排主喜哥話：「以前魚排位唔會俾人釣魚！𠵱家好釣嘅原因，一來係養開魚多嘢食，更重要係排底有好多『沉積物』，所以特別聚魚！」記者試過喺西貢碼頭垂釣，玩咗大半日，都係得魚毛三兩條；初哥試釣的Maggie、Winki同Stanford，3個鐘竟然有4至5斤戰績，中鈎的主要係黃腳鱲、斑仔、牛糞鱲、黃衣同泥鯭等，「雖然多數都係一斤、半斤重，中得咁密，感覺好似去咗馬爾代夫！」喜哥解釋11、12月，好多海魚都會靠岸產卵，係最好嘅釣魚季節：「基本$120已包你釣具、魚餌任玩8個鐘；呢度有客最高紀錄釣過一條8斤重牛糞鱲，不過當然要有番啲技巧啦！」
危險！小心魚排惡狗
咪睇小魚排上嘅狗，只要你哋嘅船稍接近，佢哋就會馬上出嚟「兇」你；喜哥話有人曾經作無謂之舉，將船駛近仲要撩佢哋，點知魚排嘅狗竟然助跑跳上船咬人，你話係咪無謂呢！
任食BBQ+即燒海鮮
釣上嚟嘅戰績，最好當然係即刻食咗佢！呢度設有燒烤爐同蒸魚設備，咁食就最新鮮！如果咁唔好彩釣唔到魚，喜哥話：「其實附近魚排仲有人出海網魚，而且賣得幾平吓！」以個人經驗，一般鱲魚、蟹、泥鯭，買佢3幾斤（因為會混雜嚟賣）只係$100有交易，10個人都食到攬住個肚，最重要係全「生口」勁新鮮！「其實$120釣魚費裏面，仲包有任食BBQ，豬仔骨、金沙骨、腸仔、龍蝦丸、豬扒全部有齊。」不過汽水、礦泉水只包各一，如果要另買汽水啤酒，都係$5至$6，如果自己帶酒水開心吓，一樣無任歡迎！
魚排美食推介
鹽水蒸蟹
蟹冇得釣，但有得賣！當日時價$100/4斤！細細隻、喜哥話：「剛網嘅蟹即煮會有鮮甜味，街市養過嘅同佢冇得比！」我嘅評語係，寧願食佢都唔喫大閘蟹，你就知有幾鮮甜。
油鹽水泥鯭
完全冇泥味同火水味，以油、鹽、水加白胡椒白灼，好水上人風味。
魚排青口
唔係個個做到，因為要同喜哥Friend同識潛水，先可以落魚排底潛青口！「加豉油一燒，味鮮！可媲美法國青口！」
青口面生滿蠔殼
原來只要在木枱面用力一捽就甩晒，係水上人的智慧之舉。
開心大發現
有坐廁！
由於魚排同岸邊只是100米之近，基本上水、電都完全有供應！最正是將魚排傳統嘅踎廁改成坐廁，不過，因在海上會搖晃，小或大解後要立即彈起，避免排泄物濺起弄到身上。
獨家高速水泡任玩
「今年11月真係咁多年來最熱，日頭平均去到27、28℃，所以仲可以趕尾車玩水上活動！」基本上10個人去，放低$800就可以2個鐘輪流任玩高速水泡、Wakeboard同香蕉船，「夏天旺季，我哋一般要收成$1,400，𠵱家只係6折收費啫！」Wakeboard、香蕉船好多地方都有得玩，不過喜哥最近新返咗隻高速水泡，佢話暫時係獨家，而且唔使點掂水又有救生衣，玩得安全好多！
成架飛起 超驚嚇
初睇係一個大水泡，冇乜殺傷力！玩落先知，每當快艇急轉彎，高速水泡就會以快艇為軸心，以弧線在水面兩邊滑行，轉得急仲會成架飛起！
包學識Wakeboard
試玩個案：Winki
經驗值：學過兩次，仲未上過水，即係唔識！
經過：基本在魚排之上，會先教曉「起水」基本動作才正式落水，竟然第一次就起到水！
感想：「其實喜哥喺西貢出晒名，教Wakeboard一定教曉上水！」可能佢係水上人出身，日日揸艇當揸車咁，佢教初學者唔好「握手」角力，就輕易起到水！
10人收費表
釣魚＋任食BBQ$1,200
（附加）Wakeboard+高速水泡+香蕉船$800
（附加）生猛海鮮$100
總數$2,100（每人$210）
有用資料
名稱：白沙灣魚場水上活動（96511905）
地點：麻南笏魚排
交通：於西貢白沙灣有專船接送
開放時間：10:00am至11:00pm