【上海直擊】上海東方藝術中心前晚舉行「2006中國風尚大典」，大會請咗80位中外名人出席，包括張曼玉、劉嘉玲、朱茵、楊丞琳同羅志祥（小豬）等等，台灣名模林志玲以頒獎嘉賓身份出席，佢着住價值十幾萬嘅CHANEL水晶禮服行星光大道，大受fans歡迎，佢喺後台同中國超模杜鵑一見如故，又讚對方好靚，兩岸第一名模仲影咗張難得嘅合照。
小豬一身Gucci現身大典，佢話自己除咗外在美之外，都好注重身體嘅「內在美」，佢自爆上月做咗全身檢查，「小弟弟」畀年輕護士睇蝕兼摸勻晒，小豬話雖然好擔心「隱私」曝光，但為咗健康着想，都硬住頭皮除褲，同埋提醒護士唔好話畀人聽睇過佢嘅重要部位。問小豬當時有冇生理反應，佢話：「都快緊張死了，哪還有反應！」
張曼玉獲頒風尚國際典範大獎，佢話好少攞電影以外嘅獎項，感覺好特別。佢又話可能會同導演賈樟柯合作，不過要等對方寫好劇本先決定，仲聲稱係賈樟柯嘅影迷。
曼玉又提到近幾年先真正搵到屬於自己嘅生活，希望生活過得慢啲，拍戲就隨緣，如果遇唔啱好戲，可以五年唔拍。
攞獎敬母親
劉嘉玲就奪得港台區最具風尚女演員獎項，佢話對問鼎金馬獎影后好有信心，仲希望同母親一齊分享呢個殊榮，佢用普通話話：「我父親剛走，母親現在對我的提名都會很關注，所以一定會在第一時間和她分享。」
採訪、攝影：盧健
