香港賽馬會下星期二加碼推「勁賞金多寶」，頭獎若一注獨得，幸運兒估計可捧走3300萬元彩金，單係聽到咁豐厚嘅獎金，唔少市民都「未攪珠、先興奮」。事實上，發達確係好多人嘅夢想，未中嘅人更加充滿幻想，一早已經諗定點處理啲錢，只不過喺度等緊幸運之神眷顧啫。係《MSN》討論區中，網友DFC2003就開咗個題目問：假如中咗100萬美金（約778.4萬港元）會點使好？
大部份網友回應都話，會先還清負債同樓宇按揭等，之後先會再諗剩餘嘅錢點用，例如旅行、買車、買樓、買基金或股票之類。網友afreakingname話，佢會先用30萬贖樓，其餘啲錢會用嚟買股票同債券，仲會打份風流工，每年只返工9個月，留番3個月去啲生活指數較低嘅地方度假。ARCHIEtheDRAGON講得比較簡單同直接，佢話如果中咗百萬，就會辭工唔做，等佢能尋回自我，再重返校園喎！
Justpassingthru就話，天有不測之風雲，所謂嘅投資都有可能失利，房屋都有可能被風吹塌，有啲人鍾意窮一生精力去為未來打算，但禍福無常，不如及時行樂啦！難怪Phil5185會話，有好多天降橫財的百萬富翁，中獎前都好似懶有預算咁，但唔使幾年咪又係使晒啲錢，打回原形！