採訪當日去到「爵士拉麵」，門外貼了個月曆，Mark住近幾個月嘅休假及開門日子，差不多各佔一半，即問台灣籍老闆娘小村太太：「點解你哋經常休假嘅？」「因為我哋做畀自己食咋嘛！」答得多麼理所當然！剛過去的10月只開咗17日，除咗逢星期一及二休假，其餘休假日子純粹即興，小村太太解釋：「有時朝早起身覺得攰，狀態唔好，煮唔到好味嘅麵，既然做唔到最好食，點解要開舖？」聽落又有點道理。
店子座位只得二十個左右，但每次開舖都有長長人龍，所以小村先生設定「不接受第二次落單」的規矩，嘩!好囂張，原來都係為客人好：「我哋呢度係Serve食物，而唔係一個畀客人傾偈嘅地方，如果客人食食吓又要食多幾樣，對排緊隊嘅人就好唔公平！」而餐牌上的拉麵及小食更不多過二十款，換個角度看，其實是專業，「我老公做天婦羅都好好味，但做得拉麵就要專業，種類過多只會降低質素。」日本人做事的確特別認真，二人做這間拉麵店囂張得認真又專業。
記者：黃若茵
攝影：伍慶泉
雜錦拉麵$28（小）$32（中）
雜錦餸有蟹柳、日式滷水蛋、叉燒等，最適合食量不大的女孩子。配合醬油湯底夠香濃。
芝士餃子$25
餃子都是老闆娘自己包，半肥瘦豬肉內加入Mozzarella芝士，口感特別軟熟。
爵士拉麵（26769348）
地址：粉嶺聯和墟聯昌街2A6號