星期二睇報紙，方知香港大學學生會要退出香港專上學生聯會（學聯），故此在校內舉行學生「全民投票」，多數學生同意嘅話，港大學生會就正式退出學聯，以後各走陽關路。報載港大學生會會章規定，全民投票人數須超過學生總人數十分之一，方算合法，港大學生本科生人數約九千五百人，換言之，只要九百五十人投票，接近五百名學生投贊成票（假設其他人棄權），港大學生會退出學聯就會成為事實。
搞學生運動，從來都是小眾之事，5%嘅學生可以支配大局，其他95%學生多數漠不關心或者矇查查，根本唔知道學聯係乜嘢一回事。學聯自成立以來，都係走反建制路線，六七十年代反帝、反殖、反日、保衞釣魚台，後來各學生會向左轉，認同四人幫，加入批林批孔；四人幫垮台後，本港學生會領袖受到精神震盪，唔知點算後，學生運動散晒，到八十年代中先至復甦，支持香港回歸中國。回歸之後就爭取民主選舉。
做學生，點都要有啲理想（無論點樣空洞激進）與激情，將來先至有希望，如果在學時已學識與當權派親近，以見領袖為榮，呢類學生將來一定係好現實，向錢看，向權力低頭之人物。港大學生冇咁差啩？就算批評學聯財政不清楚，行政混亂，咪走去競選學聯幹事會，執正佢囉，點解要退出？最近保釣人士紀念陳毓祥逝世十周年，陳毓祥做過港大會長，學聯領導，如果佢在泉下知道佢啲學弟學妹話要退出學聯，唔知會唔會喊一餐。
大學生在學生會活躍，能夠學習寫作、組織、宣傳各方面能力，對未來事業好有幫助。現在一啲風雲人物，如吳靄儀、陳婉瑩、詹德隆，許仕仁，科大衛（中大歷史系教授）、何俊仁、馮紹波、麥華章等等都係六十年代末七十年代初港大學生會或學生報名人，資深大律師郭慶偉亦係其中一位。參加學生會會犧牲唔少學習時間，學業成績唔多唔少會受到影響，但真正嘅叻仔叻女就能兼顧各方面，上述幾位就係表表者。