我好鍾意食雞，鹽焗雞、炸子雞、白切雞、豉油雞、炒雞球、薯仔燜雞，家中餐枱每晚梗擺有一款。在眾多食材中，雞都算形象百變，轉轉煮法或加另一種汁料煮就成為新口味，直到最近更被我發現多種雞的新煮法，其中的大良銅盆雞，特別用銅盆浸醃雞，令鮮味保持得更持久，還有甘香龍江雞、重慶香辣雞……全部都以新形象示人。
記者︰方綺君
攝影︰林栢鈞
Model︰Bianca
自製醬料雞更香
無雞不歡，每日食飯其中一道菜必有雞。西式雞來來去去都是煎同炸，都係中式雞嘅煮法多變，香口嘅炸子雞、惹味嘅宮爆雞、補身嘅人參雞……不過用雞做主題的菜式依然日日新鮮。今次在廟街的「頭啖湯」，翻開菜單，用雞做主題的菜式有十多款，最驚訝嘅係見唔到意料中嘅冬菇蒸雞、豉油雞咁簡單，反而見到陌生嘅名字如籠仔滋補雞、甘香龍江雞、大漠風沙雞，款款都加上秘製醬汁，以醃式浸煮而成，如甘香龍江雞每日僅售3隻，用加入多款香料煮過的豉油浸製，除了餐牌上的各款雞菜式外，食客亦可要求自訂菜式做法，更加有食住家菜的感覺。
烏雞煲湯唔肥膩
店名叫「頭啖湯」，當然提供中式老火燉湯，頭啖湯的燉湯有一個宗旨，就是不加味精。不過午市供應100盅，晚市只供應50盅，點解賣咁少？負責人秦先生話︰「我哋要Keep住質素，同埋賣得多就唔矜貴啦！」而秦先生向來對食有研究，鍾意同大廚一齊到廟街附近的菜市場買新鮮材料，店中大大小小的材料都是每日新鮮入貨，好有住家Feel。店中最新上場的兩個燉湯都用竹絲雞（烏雞）煲湯，因為竹絲雞比一般雞瘦，脂肪較少，湯水自然少油，飲一啖嘴邊都唔會油淋淋。
第一種：銅盆浸醃保鮮味
大良銅盆雞 $68/例牌
主角除咗雞，仲有銅盆，可以令香料的味道蘊藏於銅盆內，鮮味更為持久。香料有紅棗茸、均安大頭菜粒、蒜片、亁葱片、沙薑粒等醃製新鮮雞件10多分鐘，蒸煮過後可以連醃料同食，紅棗味道突出。
第二種：特製醬料更香濃
甘香龍江雞 $98半隻 $180/隻
限量發售的甘香龍江雞，每日用特選雞味較濃的新鮮龍江雞，秘製雞水浸熟後塗上大廚用其他香料同煮過的醬油，顏色吸引，味道香濃獨特，甜甜的不知不覺愈食愈多。
第三種：加亁辣椒更攻鼻
重慶香辣雞 $52
用兩種亁辣椒炒成，一入口香辣味十分霸道，辣味立刻充滿整個口腔，雞肉斬成小塊更易入味，薄薄的芡汁均勻地包在雞面，色香味皆有，不過唔食得辣就唔好試喇！
籠仔滋補雞 $68
用籠仔鋪上荷葉蒸的滋補雞，一開蓋有淡淡荷香，點解叫滋補雞？因為蒸的時候會加入紅棗、茨實、薑片等材料。茨實性味甘平，有補脾祛濕、益腎固精的功效；紅棗滋補令面色紅潤；薑祛風散寒、活血去瘀，女人至啱食。
鯊魚骨燉竹絲雞 $38
主要材料有鯊魚骨和螺頭，分別有增強骨膠質、消除腫瘤、防癌症和滋陰補腎、養顏活血的作用。而把竹絲雞混合鯊魚骨一起熬湯，味道香濃柔滑，湯底鮮甜味美，營養豐富，為皮膚補充水份更添加彈性。
當歸北芪燉竹絲雞 $38
這個以中藥當歸、北芪、天麻、南棗、果皮為主的燉湯，可以行氣活血補暖驅寒。天麻能醫頭痛頭風，以新鮮竹絲雞加進北芪、南棗、果皮等材料燉，湯底味道更鮮甜。喝下補氣滋陰，寒氣全驅，特別適合體質虛弱人士飲用。
食客有Say
搵食攻略
頭啖湯私家廚（29578998）
地址︰油麻地廟街259A地下C座
營業時間︰11:45am-11:00pm
交通︰佐敦地鐵站C2出口
座位︰約30人
人均消費︰晚飯$80-$100
