林海峰食髓知味又搞棟篤笑，12月15日至18日在會展暫演四場。
上次他的口號是30'mething，今次他錯了，就叫30'methingwrong。
有甚麼錯呢？叫他自己說，誰知他有雙重標準，錯的未必真錯，對的也不一定對。
遺憾的愛情，原來可帶來另一段美滿婚姻；離開沒火花的電台，回頭才有新發現。
一個銅幣看兩面，對與錯怎分？
最錯的是不讀好書，做棟篤笑帶歡樂給大家，則是他現時做得最正確的一件事。
卓韻芝早前自殺獲救，陳輝虹在傳給對方的SMS中寫道：「生命的美處不在乎你有多快樂，而是別人因為你會有多快樂。」
林海峰，這次錯不了！ 撰文：胡比、蔡如玉
林海峰是個慢熱內斂的人，不容易談自己，要他自數20歲、30歲及40歲三個階段自覺做得最正確及最錯的一件事，他聞言哈哈大笑，然後又保持一慣木訥表情說：「我日日都錯緊㗎喎，每日都做錯嘢，成日都覺得自己做得唔夠好，乜都好似準備唔夠咁囉。」
回望過去，你做對了幾多？也很少人會自覺有錯，數得出的，定是你人生中放得最大的事情，林海峰絞盡腦汁，不停摸頭摸手，他經常是個模稜兩可的人：「講錯事真係考起我，其實我份人好雙重標準，有時你覺得錯咩？其實又未必錯得晒，舉例嚟講，好似你去做運動，係好健康，但做完之後又走去食番支煙喎，咁即係健唔健康呢？我係嗰啲又要馬兒好，又要馬兒不吃草嘅人。」
對 20歲--揀拍《天空小說》
「記得有一年，原本有一個價錢好可觀嘅電影搵我拍，各樣嘢都冇問題，我隨時可以接，但咁啱同一時間我又寫緊一個劇本，諗緊係咪可以拍成短片，兩樣工作二揀一，卒之我揀咗後者，就係拍咗《天空小說》囉，雖然我冇咗一筆好大嘅收入，套短片都冇為我帶來乜嘢進賬，計落好似唔啱數，但我覺得呢個選擇，我係做得啱嘅，因為喺過程中我得到好多樂趣，係用錢買唔到嘅。仲有記得讀完書之後就去咗一間廣告公司做嘢，嗰陣時我喺間公司連個位都冇㗎，做咗半年都係學緊基本功，學吓畫線、點樣用鉛筆、砌吓稿咁，表面睇似嘥時間，後來我先發現，原來呢半年基本功對我係好有用嘅，之後我知道做乜都好，都要打好個基礎。」
30歲--力爭返商業2台
「有個時期公司（商台）調咗我去1台做嘢，我強烈要求要返番去2台，最後我成功咗，我覺得呢個據理力爭嘅決定係啱嘅，不過𠵱家諗諗吓可能係錯都唔出奇，可能我喺1台會有啲唔同嘅發展，對我比較好都唔定㗎喎，所以我都話我個人有雙重標準㗎啦。」
40歲--發揚talk騷文化
「我好努力同希望可以做好個talk騷，希望唔係只係做一、兩次，好似逢場作戲咁，希望可以發展吓呢個表演嘅形式，因為香港係可以有呢個文化。個talk騷叫踎低噴飯30'methingwrong，其實呢個係一個行動嘅代號，希望大家入嚟睇嘅，可以睇到踎低噴飯，笑住走，希望大家有時對某啲事嘅睇法可以用呢個反應去化解。點樣先可以令到觀眾踎低噴飯呢？呢個壓力一定會有，我都怕啲人對我期望過高，好似黃子華第一次做棟篤笑嘅時候，佢都有叫大家將期望放低啲，我度稿嘅時候都有同朋友傾過個內容，啲朋友評語都話OK，叫我唔需要有咁大包袱。」
錯 20歲--悔學唔好中文
「最錯咪唔學好啲中文囉，𠵱家有時都會讀錯字，又發音唔正，我𠵱家做節目嘅時候成日都寫稿，好鬼鍾意寫字，成日學啲字點寫囉，我𠵱家都會要求我啲小朋友學好中文。」
30歲--分手成就婚姻
「每個人都有一段好遺憾嘅愛情。雖然我30歲嘅時候有一段好遺憾嘅愛情，不過你冇飛甩嗰個，又點會有另一個出現呢？雖然唔知飛甩咗嗰個，如果當時最終都同佢一齊嘅話，到後來會有點樣嘅結局，但我覺得我𠵱家嗰個冇飛甩到就係好啱囉。」
40歲--回歸電台有火
「其實呢個都唔知係錯定啱，之前我有段時間離開咗電台，本來諗住有其他發展，但後來又返番電台做嘢，之前我離開係因為我覺得有好多嘢都做咗，唔知可以再做啲乜，但返去之後，又做咗一啲我未做過嘅嘢，好似同一啲新同事合作做頒獎禮，擦出唔少火花，我都冇諗過可以同新同事咁夾咁傾得埋，呢啲就真係人生交叉點啦，如果我冇返電台有第二啲發展，發展得唔錯，咁即係我返電台做嘢係錯啦，但我冇返嘅話，咁我就會失去咗一啲我以前估唔到會做到嘅事。」
攝影：陳順禎
