曼城頭場對住紐卡素，講真兩隊都唔係踢得好，分別排14同19。亞洲盤方面，通常是受讓嘅曼城竟然要讓平/半，真係世界變囉。哎！紐卡素又真係唔抵幫，聯賽踢到不知所謂，但係一踢歐協盃就好鬼精神，喺歐協盃未出局前擺明放棄聯賽。
曼城雖然唔算強，但皮雅斯班球員尚算聽話，喺主場仍然保持不敗。今個星期對住自暴自棄嘅紐卡素，仲唔乘機攞3分？
博利記作客開齋
車仔主場對屈福特難度唔大，絕唔相信車仔會好似上場咁由贏變輸。況且就算曼聯失分嘅話，計得失球仲係要做老二，今次對住屈福特點都要贏番3、4球。一嚟沖沖喜，二嚟出氣！
最後不得不提嘅係阿仙奴大戰利物浦。唔講唔覺，原來利記今季聯賽客場仲未贏過波！我個人比較睇好今次可以開齋，因為自從班波攞到歐冠盃出線權後愈踢愈好，連贏幾場。最重要係謝拉特移去右路打最擅長嘅位置，減輕咗防守嘅工作，對進攻更為有利。
相反，阿仙奴好似又入咗去黑色11月咁，成日都贏形勢輸波，今場好大機會都係咁。
謝利
立博亞洲區首席博彩顧問
電郵：[email protected]