農圃中菜餐廳早就係名人嘅聚腳地，賭王何鴻燊、李國寶、周星馳等全都係座上客。最近老闆開新分店「捌號餐廳」，主打中、西、日Fusion菜，龍蝦湯加入中式貴價食材海虎翅、日式拉麵加入32頭鮑，Fusion玩味十足，難怪過去兩星期仲係試業階段，已引來劉鑾雄、米雪、黃百鳴等名人光顧。加上價錢唔算太貴，百多元一款菜，一般平民百姓都食得起，分分鐘仲有名人坐喺你隔籬陪食㖭！
記者：黃若茵
攝影：伍慶泉
模特兒：Joey
提供另一落腳點
要開姊妹店擴充業務，「農圃飯店」的確有資格，自86年開店至今，捧場客不乏名人明星。但原來開「捌號餐廳」唔係想賺多啲，而係諗住畀一班熟客仔有多個落腳點，負責人陳小姐話：「『農圃』本身已經係一個名人飯堂，老闆諗到客人幫襯咗咁耐，不如開分店，為一班同樣對飲食有要求嘅人提供落腳點。」新分店主打中、西、日Fusion菜式，「老闆本身係大廚，呢度嘅餐牌都係佢自己做，佢喜歡喺一處地方可以乜嘢都食到，加上『農圃』嘅中菜已太過深入民心，需要多點新意。」所以，西式龍蝦湯都要加束海虎翅、日式拉麵就加鮑魚，的確夠新鮮！
百萬豪裝 全港最長魚缸
既是名人飯堂，裝修梗要有睇頭，最矚目係一個20呎超長魚缸，用咗60萬，養咗188條熱帶魚，老闆果然豪氣兼不惜工本。除咗魚缸，餐廳環境跟Fusion菜式都幾配合，主要嘅布置及餐桌擺設為西式，但採用紅、金色又多了點中式貴氣，另設有壽司吧及開放式廚房，入到嚟都估唔到呢度究竟係食中、西定係日菜。而食材質素有「農圃」撐腰又點會無靚貨，快啲睇吓有乜食啦！
1.鮑魚番茄豬骨湯拉麵$128
拉麵由日本入貨，湯底以鮮豬?熬足3日3夜，加入澳洲肉茄更顯鮮甜味。鮑魚選用南非32頭鮮鮑，食得尊貴又玩味十足。
2.澳洲頂級和牛肉眼扒（6安士）$520
一般餐廳都只用到M3至M4級和牛，但這裏用到M9級（最高為M12級）。只簡單地灑上海鹽及少許黑椒，烤至4成熟肉質最好。
3.精選刺身$360
海膽、牡丹蝦、池魚及拖羅每款兩件，當中最愛拖羅，雪花分布均勻。刺身每日由日本入貨，由於入貨量少是以能確保新鮮。
4.黑豚肉（6安士）$160
黑豬肉由日本鹿兒島入口，以日式特製麵豉醬醃足1日1夜，烤熟後肉質鬆化，且十分爽口，美味！
5.澳洲羊架（8安士）$180
選用澳洲貨因為肉質鬆軟而不會過羶，跟和牛一樣只加海鹽調味，以保證入口原汁原味，吃時蘸上少許薄荷醬味道更清新。
6.海虎翅龍蝦湯$198
將中蝦、龍蝦頭、石斑等海鮮炒香，再熬4至5個小時，做成香濃湯底。海虎翅本身無味，不怕跟龍蝦湯味道相撞，反可增加口感。
搵食攻略
捌號餐廳（28811222）
地址：銅鑼灣新寧道8號民安廣場1樓
營業時間：12:00pm-2:30pm、6:00pm-11:30pm
交通：銅鑼灣地鐵站F出口
停車場：隔一條街開平道3號有威信停車場（$24/小時，不設最低消費）
座位：100個
人均消費：午市$138-$230；晚市$480-$1,280
最好賣：拉麵