上個星期五恒指跌咗62點，不過受金價回升刺激影響，好多金礦股升勢凌厲，升幅最勁係湖南有色（2626），達12%之多，而靈寶黃金（3330）及紫金礦業（2899）亦升咗5%及2%。唔少網友紛紛討論金礦股係唔係值得買入，以及金價未來能否維持升勢。
《香港討論區》網友kh430話：「（周五）下午5時金價已升穿637美元，相信星期一開市有機上試640美元，手持紫金礦業及靈寶黃金之散戶，請坐穩快車。」clap笑言：「買盤好強，金礦股一直唔肯回落俾人上車。大摩又有增持，無咁上下利潤佢哋都唔會放貨啦，所以大家唔使驚，最多只係怕大戶玩嘢，遲啲強行質低個價入貨。」
網友小時前認為，港股正搵緊好消息派貨，所以港股會有下調迹象，而黃金當然係最佳嘅資金避難所，一定要趁低吸納。johnay亦同意佢嘅講法，當資金轉向買金之時，可能反映股市快將調整，佢更話：「黃金升得咁狠，即表示好多投資者都睇淡股市，這樣炒股嘅朋友就要小心啦﹗」其他網友亦持類似睇法，相信美元弱勢已成，兌歐元及英鎊都出現大幅下調，估計美股遲早會大跌，屆時全球股市勢必受到拖累，金價自然就會不斷上漲。