港股氣勢真係好勁，調整1日，又再上過，恒指大升141點，國企同中資股仲勁，H指高收7911，大升164點，升幅2%，大行預測明年第一季H指會見8000點，睇𠵱家個勢，可能呢個月就到。
強勢股續創新高，落後股開始發力，個市升勢咁勁，而且調整之後，仲會再創新高，咁落後股點會唔升，差遲早而已。
國企落後股唔少，噚日開始發力嘅慶鈴汽車（1122）就可以優先留意。H指已創出新高，慶鈴仲係大大落後，唔好計97年嘅高價5.36元（除息計），就算同05年中嘅1.88元比較，現時股價仲跌咗35%。慶鈴有追落後概念，難怪呢輪就頻頻見到有大行收集，看來短期內有力收復一部份失地。
慶鈴噚日收1.23元，升7仙，一支大陽燭升破250日線（1.164元），成交亦大增到近3000萬股，係自4月中以來交投最勁1日，MACD亦出現雙牛入貨訊號，10日線（1.148元）及20日線（1.142元）亦會在未來幾日升破250日線，中期上升大浪確認，股價初步可見1.40元，整固後再上，可重遊05年高位1.88元。
日資「五十鈴」05年中公開增持慶鈴，以每股1.92元食咗3.25億股，現時佔H股逾40%。五十鈴加碼後，慶鈴今年上半年嘅業績已明顯有進，有五十鈴大力提攜，慶鈴應該好快大翻身。
股價折讓逾50%
仲有，慶鈴每股資產淨值2.58元，現價相對折讓逾50%。炒落後、炒股價折讓大，已經大把概念，仲有，五十鈴高價入股，若時機配合，點會唔做工夫？
呢輪推介股票，好多都係過咗幾日就會有表現，好似上月底講隻中鋁（2600），推介時股價係5.54元，之後仲見過5.26元，噚日已上到5.92元；幾日前推介嘅遠展（035）（3.21元），亦上到3.45元。
仲有，佑威（627）噚日股價同成交都回升，整固似已完成，可吼位追進，升破0.285元，可見0.35元。
郭兆誠