渣打請食泰昌蛋撻

渣打請食泰昌蛋撻

星期一滙豐一話減息25點子,成個銀行界亂晒陣腳。個個高層都忙住開會,傾傾應該跟風減息,抑或不變應萬變。雖然鬼咁忙,渣打香港執行董事兼行政總裁蘇利民,噚日都抽空出席「渣打書節06」嘅記招。
雖然蘇利民不斷俾記者追問息率走勢,佢都不忘大讚書節有意義,仲同林旭華一齊將藍綠色彩沙倒入書本,代表書節充滿新力量。
第二年同書節合辦嘅「渣打書節06」會喺今個月17至19、24至26日維園舉行,今年仲免費入場,連$10入場費都可以慳番。渣打旗下七間位於中環、尖沙嘴同旺角等分行特別加設「悅讀書廊」,擺放推介書籍如《摘星少年陳易希》同《蛋撻的故事》,客戶睇完書記得攞埋張書籤走,憑書籤入書節買嘢,有好多折扣㗎。
華華聽聞今次仲破天荒請泰昌餅家揸弗人歐陽師父,教大家整連末代港督肥彭都大讚嘅曲奇皮蛋撻㖭!唔知下年會唔會教人包麥奀記雲吞呢?