天口凍凍哋，突然好想燒嘢食！朋友介紹九龍城有間日式燒物好有HomeFeel！老闆娘Janet話：「我哋所有食物都唔會搵代理攞貨，每日都行街市，睇見邊樣新鮮買邊樣！」
老公兼大廚Leo剛買完餸，踩住架單車返嚟：「其實我有電單車牌，去得遠買貨會用；不過如果行區內街市就用單車。」咁想慳家定為環保先？老闆娘插嘴：「兩樣都唔係，應該係『為佢好』；做廚師成日要企，好易有靜脈曲張，踩吓單車可以做運動，對身體好啲嘛！」
開着爐！熱氣香味四溢；「我哋呢度啲燒物，基本上全部冇醃，新鮮肉食菜蔬本身就有陣鮮甜香味，多做手腳反而令味道失真。」的確冇錯，有啲舖頭做燒物前喜歡先做醃味，好明顯係對自己啲材料冇信心：「至於燒好後，喜歡惹味啲，我哋會加椒鹽及七味粉提一提味，完全日本風味！」
試食後！醒覺有時煮嘢食好簡單，材料純樸、製法簡單都可以好好味。
記者、攝影：朱崇德
日式燒牛扒$58
牛扒底面輕輕一燒至5成熟，馬上切粒上碟！肉質幼嫩有如棉絮，入口即化，仲有牛肉油脂在口中輕盪，謹記要快食呀！
羊西冷$50
羊西冷整條燒，然後再切薄片，肉汁油脂完全鎖緊在肉中，入口羊羶味唔重。
烏頭$38
天氣轉涼烏頭馬上變肥，香燒後魚油滲入肉身中，更增添味美。
83美食亭（23836583）
地址：九龍城打鼓嶺道74號地下