鍾楚紅息影多年，但依然好有星味，前晚紅姑難得出巡，同女伴去跑馬地彭慶記食家開餐，即時吸引大班記者追訪。
親切揮手拜拜
前晚紅姑約女伴食晚飯，選坐位置開揚，毫不介意食相任人睇，其間佢同朋友傾得好開心，大家有講有笑，紅姑聽對方講嘢時，仲以手托頭聽得入神，其後當佢發現有記者喺門外影相，即時要求換位，轉坐較隱蔽嘅一枱。
到11點零鐘，紅姑食飽飽後，由女伴先去附近攞車，跟住紅姑就戴上墨鏡，孭住大手袋，施施然行出食肆，現場見佢清減唔少，由之前嘅圓碌碌身形變苗條，成個人有番線條，紅姑見記者即刻帶笑撒嬌話：「乜你哋咁樣㗎？」但佢就好有禮貌，臨上車仲同記者揮手拜拜，再由女伴充任柴可夫接送離開。
紅姑當年咁紅，到𠵱家待人接物都咁大方得體，嗰啲行街被人影幾張相就發爛渣嘅藝人，唔該向紅姑學吓嘢啦。
