近期喺投資特攻隊推介烏克蘭嘅薩克達、西甲維拉利爾同埋英超阿仙奴，總算冇令大家失望，今次我賴恩睇好嘅大藍籌，就喺巴甲聖保羅，捧佢哋作客贏戈亞斯；而2、3線股就揀英超韋斯咸，博佢偷雞贏米杜士堡！文：賴恩
今季巴甲殺到入最後直路，睇番𠵱家個形勢，冠軍錦標非聖保羅同埋國際體育會呢對歡喜寃家其中一隊莫屬。諗番8月嘅南美自由盃決賽，國體會爆冷贏咗聖保羅，搞到聖保羅不知幾掃興。喺當前有利嘅形勢之下，聖保羅絕對唔想重蹈覆轍，俾國體會標埋個尾會，所以今次嚟到戈亞斯個場，鬥心一定俾對手強，更何況論實力同埋近況，戈亞斯始終難以媲美。
爭標緊湊1分也不能少
講番𠵱家巴甲嘅形勢，未計今朝聖保羅主場對保地花高嘅成績，佢哋同次席嘅國體會依然保持住4分嘅差距，但國體會周六只係對住福塔雷薩，3分應該手到拿來，令到聖保羅嘅榜首位置出現告急，今次作客戈亞斯真係1分都不能少。
戈亞斯係一支典型崇尚進攻嘅球隊，而且攻強守弱，目前佢哋名義上都仲要為爭南美自由盃嘅席位而努力，可惜今季缺少咗保羅巴亞同埋羅廸高達巴達幫手之後，成班波戰力大減，想贏聖保羅，只怕有心無力。
反觀聖保羅，近期佢哋嘅表現的確有啲回軟，不過更教人注意嘅係佢哋嘅防守能力，甚少失多過一球，而呢個正正就係聖保羅賴以成功同埋值得大家支持嘅原因；仲有嘅就係佢哋今季入球分布相當平均，3線球員都識入波，就連門將羅渣里奧嘅百步穿楊式罰球同12碼都一樣咁搶鏡，呢種防不勝防嘅入球方式先係令對手折服嘅力量。
韋斯咸乘勝攻米堡
冷腳方面，英超韋斯咸喺星期日打殘咗阿仙奴，不知幾威風，今次佢哋作客米杜士堡，相信會再俾驚喜大家！睇番韋斯咸近兩場比賽，表現真係有板有眼，而且早兩日球會為咗幫「阿根廷孖寶」盡快適應球隊，特登安排場閉門熱身賽俾佢哋兩位仁兄練習，而且泰維斯仲開埋齋，今場波隨時成為佢嘅翻身之作，真係要支持吓佢，何況米杜士堡家陣狀態都唔掂，一個起一個沉，明眼人都知要邊隊啦！
投資特攻隊金句
聖保羅實力超班，而且只要贏埋戈亞斯，就可進一步拋離國際體育會，所以今場波一定打醒十二分精神應戰，何況又喺客場成績好，贏面相當高。