花旗國人民喺我哋特區時間星期二晚，透過選舉機制將扮演立法機關嘅國會控制權，從共和黨手上交畀民主黨。雖然一日之後，日日食雞嘅陳馮富珍當選世衞總幹事，不過共和黨喺花旗國中期選舉中大敗，都尚算有天理。選舉一結束，世界各國好多財經、政治口水佬即刻大肆分析一番，特別係對未來股市表現有好多猜測。不過除咗零星只會影響一兩隻花旗國股價表現之外，孫柏文仲未見到有任何民主黨提出嘅政策，可以在短期內影響特區股市，因為民主黨整個競選政綱只得三個字，就係「Bushiswrong」。
其實，「傳統智慧」已經猜測未來兩年，民主黨控制嘅花旗國國會同有立法否決權嘅牛仔總統，唔可能會有重大政策改變。「傳統智慧」相信正因為國會通過任何重大法例，都會被總統否決，所以國會有見及此，未來兩年都只會有如12月嘅西伯利亞一樣，漫天風雪咁狂發用白色紙張印刷嘅傳票，「邀請」牛仔總統啲馬仔出席國會聆訊。孫柏文對於呢個「傳統智慧」，當然完全唔同意。
無可否認，民主黨同牛仔總統喺好多政策層面上意見有分歧。不過有一樣可以確保花旗國長遠有經濟增長嘅政策，佢哋做好合拍。大家可能會覺得佢哋冇可能合作，其實係有，任何地方想有長遠嘅經濟增長，就一定要不斷引入有拼搏精神嘅人，加入勞動人口。而民主黨同牛仔總統，就係可以終於解決花旗國非法勞工問題。到時花旗國有大量從墨西哥來嘅廉價勞工可以合法做嘢，長遠花旗國經濟一定有運行。以前牛仔總統都嘗試過黑工合法化，不過畀自己共和黨嘅國會議員阻撓。
未來有大批勞工加入花旗國經濟體系，對特區、祖國亦都有好處。點解？特區、祖國借咗咁多錢畀花旗國政府，如果冇大量新進工人返工，花旗國政府又可以問邊個抽稅還錢呢？
最後，雖然孫柏文一向以來都好抗拒陰謀論，不過我真係覺得由8月至今嘅油價跌幅，喺「做出來」，令花旗國選民以為可以享受比較便宜嘅電油，油價遲早升番晒。我相信好多「市場人士」，特別係買咗石油股嘅朋友，都接受呢個陰謀論。陰謀論最大嘅證據？就係就算原油價跌咗咁多，石油股價（例如857中石油）都重返8月嘅高水平。如果冇錯，中期選舉日油價真係見咗底，好快就可以CU@US$80。