十個港人，起碼有八個大近視，帶挈眼鏡舖開到成行成市，梗有一間喺左近。唔講唔知，原來香港嘅眼鏡出口量，一早已經「超英趕美」。
喺今年首三季，眼鏡嘅出口就有成10億美金，同舊年同期相比，升咗17%，如果淨係計送去歐盟嘅貨品，按年仲升咗33%，𠵱家排名世界第二，一哥就係「飛甩雞毛」、GIORGIOARMANI、GUCCI等名牌嘅老家──意大利。
貿發局總裁林天福噚日出席香港眼鏡展開幕禮時，見到咁多新眼鏡款亦忍唔住，搵個黑超戴吓，即時成個MIB（黑超特警組）咁款。佢話，遲啲本地廠商設計嘅鏡架會仲犀利，將太陽眼鏡同MP3crossover，鏡架用料亦唔會再揀塑膠、鋼鐵，而會嘗試改用鈦、木，總之又輕又in，就最易攻陷少年嘅心喎！