巴塞隆拿中場朗拿甸奴之所以能夠有今日地位，同佢去咗西班牙「減少」咗聲色犬馬嘅夜生活有關，但係風流賬你估話搣就搣咩？巴西傳媒周二報道，法庭判咗「細哨」要為私生子畀贍養費，最終數目可能係每月超過200萬美元（約1,560萬港元）！兄弟，「色」字頭上唔止一把刀咁簡單㗎！
巴西法庭下令，「細哨」現時要為2歲嘅私生子付贍養費，每月為9,350美元（約73,000港元），但係呢個唔係最終判決喎！根據巴西法律，父親通常要將收入嘅15至40%作為贍養費，而因為要查證「細哨」嘅實際收入，故此法庭因生活所需，只係快快脆咁判咗1個臨時費用。
據估，「細哨」現時每月可以賺到600萬美元左右（底薪、獎金同贊助合約計埋），計起嚟可以去到逾200萬美元，筆「安家費」或者「細哨」唔志在幾百粒濕濕碎，但求大俠就打足一世工都無喇！
世足先生選舉大菲唔揀佢
另外，前巴西國家隊教練、現任葡國主帥史高拉利（大菲），就自爆世界足球先生嘅選票，揀咗亨利、卡卡同泰利，就係唔揀「細哨」，連自己友都唔揀，唔通今屆「細哨」有暗湧？
「知錯能改，善莫大焉，『細哨』雖然近年收斂唔少，但佢始終要為前塵悔改，今次當係畀好色之士1個教訓啦！」