老友報料，天后有間好HomeFeel嘅餐廳，冇味精、小菜即叫即整！叫做「快樂廚房」，老闆係一對夫妻。老闆娘Vince話：「我喺廚師訓練班認識我老公Jack，當時記得佢係一個乜都要加創意嘅人……老實講，咁樣俾佢改一改，啲餸菜的確幾好味！」
二人由拍拖至結婚，都好似同食扯上關係，一齊開廚藝訓練班做導師，再開小食店「開心廚房」，仲結埋婚生埋仔！「以前我做Marketing，佢做大飲食集團人事管理，但到二人一手一腳開舖做食店，完全係兩回事！」最慘嘅一次滑鐵盧，係03年在天后銀幕街開設的「開心廚房」本店，「業主同我哋只簽咗一年約，沙士過後突然加租1倍，迫於蝕裝修離場，真係好值得創業人士借鏡！」
今年初，同名新店於銅鑼灣開張！「可能做過廚藝訓練學校，對食物出品好有堅持，朝朝親身落街市買蔬菜肉食，就連最簡單的甜豉油醬及做雞扒嘅檸檬汁，都要親自挑選；附近有啲酒店高層嚟食，都話可媲美酒店級出品！」日日返足12個鐘，唯一嘅合家歡時間係星期三餐廳全休，「呢一日我哋會一家大細行街食飯睇戲，不過最喜歡還是周圍試菜，我哋最鍾意估吓個菜嘅做法！」咪以為佢哋係工作狂，其實是寓工作於娛樂啫！
記者、攝影：朱崇德
快樂廚房（34282633）
地址：天后銅鑼灣道144號新發大廈地舖（維景酒店側）