有位網友Babykitty喺《Uwants討論區》叫大家投票，估吓未來3個月樓價升定跌，投票由10月14日開始，咁啱近日銀行減息，呢個題目迅即成為各大討論區嘅熱門話題，至今引嚟近90人投票！
有成60票、即係多過七成人都認為樓價會跌，aaaaryin話：「我估會跌啩，早排發展商企到咁硬，而家頂唔順咪又係減緊，短期都睇唔到有乜特別因素對樓巿有利，供應又多。」hunter21亦同聲同氣：「現時股市去到近萬九點，樓市都唔升，之後股市下跌，樓市就好有可能跟住跌。」仲有好多網友都話，由於之前升得太勁，𠵱家可以話係有價無市，所以樓價會跌囉。
僅一成多人估會升
其實唔係無人認為樓價會升嘅，只不過得一成多啲啫，仲要無咩理據，似乎弱雞咗啲喎。好似喺《香港討論區》嘅同類投票站裏面，睇升嘅網友wai628竟然話：「2007年，我看升小小，蘇民峰話07年夏季開始升......」連蘇師傅都出埋，真係搞笑。
bimanhot就睇到居屋重推嚟緊實會為樓市降溫，由短期到長期，都分析得幾深入：「買居屋嘅客源，就係一班原本買唔起私樓，而又有房屋居住需要嘅人。佢哋去租樓住，起碼會增加租樓嘅demand，租金亦會上升，咁租畀佢地住嘅業主收入多咗，就再增加投資入樓市嘅動力。」一句講晒，就算唔減息，都仲有好多因素影響到樓價嘅，各位都係諗清楚先好。