除咗細路仔時食過炭燒雞蛋仔外，都好多年冇見過！首先面層炭香甘脆，略帶亁燥，電爐、火水爐完全唔係嗰回事；當「啜佢個麥芯」時，仲有肉有糖心，原因是有加蛋，亦唔可以用牛油代替花生油，雞蛋仔要咁先至發得起！」一般街邊雞蛋仔只係食「殼」咋！
咁好手勢，馬上同雞蛋佬（吳伯）搭訕，「叫我雞蛋佬好喇！賣咗20年，做足20年乞兒！」街邊開檔半個下晝，只賣得兩底（$16）；再細心睇佢套搵食架生，車仔、食具樣樣簇新，邊傾偈邊把風，應該啱啱先俾人掃完檔嚟：「𠵱家啲細路唔鍾意食呢啲老餅嘢，嚟買嘅都係你呢啲30零歲，細路時食過嘅，懷舊嘛！」（以為你把風，點知把埋我？）
雞蛋佬喺邊度？實話實講即係叫人拉佢！大家由「愛」佢變成害咗佢；去開銅鑼灣同天后搵食，有緣嘅就幫襯一底啦！
記者、攝影：朱崇德