港股連續兩日喺高位整咗兩支陰燭，自然就會加強咗淡友嘅憧憬，撞啱美國嗰邊中期選舉共和黨失利，投資者都預咗前晚美股會借勢插吓，點知道指跌咗幾十點就唔跌，收市仲有升幅，你話班好友點會唔施回馬槍挾淡倉，結果就係恒指升番141點。
咁樣𠵱家個市係咪會大挾上呢？咁就要睇美股嘞。點解？睇吓昨日港股除咗話挾淡倉外，啲大藍籌其實冇乜大動作，成交仲唔見一大截，啲炒家一窩蜂走晒去炒國企股，睇啲買盤掃得咁勁，應該只係開始，今日應該仲係佢哋嘅世界，一於重鎚出擊，至於大藍籌方面，仲係滙控（005）個樣最好，啲C輪可以繼續揸。
交行C輪4562：啲國內銀行股升得好搶眼，成交大走勢好，斷唔會係短炒盤推高，照睇應該係基金買盤，基金胃口大，唔會升少少就夠數，昨日招行（3968）升得好勁，交行（3328）亦唔失禮，升上6.50元收市，技術位度上去，應該好快上試7元，破位就睇7.50元，大隻股嘅特點就係，價位升得愈高，成交愈大，升勢就愈急，交行嚟到呢個位，中線一定睇10元樓上，買啲C輪，潛在回報好吸引。
隻C輪4562昨收60仙，槓桿率10.8倍（有效8.8倍），對沖值0.81，街貨上升，引伸波幅亦回升，係鑊氣剛起嘅時候，正股升上7元同7.50元，4562應該會見到1元同埋1.50元，正股跌穿6.30元止蝕。
交行C輪9099：隻C輪9099都可以諗，昨收69仙，槓桿率9.4倍（有效6倍），正股升上7元同7.50元，隻輪應該唔會低過1元同1.40元。
俊 樺