公益金籌款,搞百萬行係必然節目,但係行咗咁多年,香港九龍新界,邊度都行勻啦,要搵新鮮有趣地方,實在唔容易。
好彩特區政府好支持公益金,有新地點適宜步行籌款嘅就明益公益金,好似喺十一月五號,就批准公益金喺后海灣大橋舉行百萬行籌款,靚女C受到新景點吸引,公司響應籌款,搵人去百萬行,靚女C立即參加,然後問人:「點樣去步行地點?」
唔坐公司車,唔會有人識去。幾十人坐埋一齊,當作集體旅行,星期日早上八時在公司門口集合出發,早上完全唔塞車,行三號幹線,長青隧道,八點半就已經到咗屯門,大家問:「呢度係屯門邊度?」冇人識答,總之唔係藍地就係虎地,城市人好少去到咁遠地方,人哋話大鄉里出城,呢班人就係都市怪下鄉,同樣不分東南西北。
落車後根據現場指示牌,上到集合地段不知幾時開放嘅快速公路,據講一路直行可以行到去蛇口,將來由九龍或中環去蛇口,揸車直通,唔使四十五分鐘,只係不知附近交通接駁如何,會唔會塞車而已。
九點過後,成千上萬人已經聚集在馬路等許老爺嚟剪綵,影相。許老爺準時到達,佢架AM車可以泊上馬路,唔使慢慢行路!公益金籌款要人柯清輝、孫大倫等在場迎接,飲過咖啡奶茶之後,舞龍舞獅,許生柯生孫生等等大家鉸剪一揮,步行開始。許生行咗五分鐘,第一個出口就上番車,調頭鬆人,其他人行呀行呀,一啲人行到第二個出口就調頭拜拜,靚女C堅持繼續向前,話希望行到伶仃洋大橋,睇吓海喎。點知未到大橋之前,已經唔准前進,靚女C大失所望咁話:「早知行咗十分鐘就走啦。」唔使驚,國務院已批准香港在大橋蛇口出口設立過境檢查站,落成後,大橋就會通車,到時公益金一定爭取在通車前搞多一次「步行橫過后海灣」百萬行,靚女C可以再嚟過。