近日網上討論區Uwants有網民舉行了一個「最受歡迎女歌手」選舉，名列第一的是何韻詩，而緊隨其後的，正是入行只有一年多的謝安琪（Kay）。雖然這個不是正式的獎項，但足以證明阿Kay甚受歡迎。不過早前她與劉浩龍合唱情歌《滄海遺珠》卻遭歌迷埋怨，令她感到極大壓力。
謝安琪最近投身新藝寶唱片公司，成為陳奕迅的同門師妹，同時間阿Kay的受注目程度更相對提高。就連網上討論區Uwants.com也有不少網民推選她為最受歡迎女歌手的第二位，聽到這個消息後阿Kay的第一個反應是：「吓？唔好嚇我喎！我真係冇諗過有咁多人撐自己，獎項呢啲我真係諗都冇諗過，有人聽我嘅歌已經好夠啦，不過我都好衷心多謝大家支持。」
被定位感壓力
阿Kay初入行時不少人將她定性為唱作歌手，覺得她不可以唱主流歌曲，甚至一定不可以是Ｋ歌。早前阿Kay與劉浩龍合唱了《滄海遺珠》，便接到不少DJ的電話，以及有歌迷埋怨她唱了這首歌，她說：「我都冇諗過我同劉浩龍合唱一首情歌啲人會有咁大反應，有啲歌迷好激，佢哋會話『你變咗啦，我哋識你時你唔係咁㗎，點解要唱呢啲情歌呀？我哋好失望呀。』」
阿Kay覺得自入行以來大家都已經將她定位，對此她揚言感到有很大壓力，她認為一個歌手應該嘗試不同的歌曲，阿Kay續說：「Eason（陳奕迅）一隻碟入邊都有情歌、有話題性嘅歌，有時會有啲歌講家人、朋友，我覺得咁樣好OK呀，我真係希望大家畀條路我行吓，唱情歌真係唔係罪嚟㗎。」
採訪：李珮洳 攝影：陳順禎
化妝：KeiKei
髮型：Jobie@HairPeace
服裝提供：MonalisaMcqueen
場地提供：海港城