「熟食市場就好似公海，自有一套地下秩序，呢度江湖人物雲集，但冇人收陀地、爭地盤，喺咁嘅龍蛇混集地方都有呢種暫時和平，算係少見。」豉油街熟食市場清拆在即，茶檔老闆娓娓細訴煙花軼事。
「啲妓女食得好簡單」
近水樓台，茶檔老闆閱女無數，他說：「10多年來靚盡紅燈區嘅有所謂『四大馬王』（出鐘最多的妓女），當中福建『珠女』最出位，佢靚到有客送金鏈、金錶，最後更被夜場重金撬走，真係風月奇談；另一個上海妹『小花』就勝在夠索，來港短短個半月就賺夠錢還清水腳，兼賺咗7萬蚊返鄉下，算係衣錦榮歸，異數啊！另兩個馬王，『瑪莉』同『日本妹』亦都係以靚著稱，好鬼搶手㗎。」
馬伕、妓女有沒有特別口味？「啲妓女食得好簡單，點個20零蚊套餐就算，啲四川、湖南妹就會要求加辣。」
「馬伕就坐多過食，口渴先叫杯凍奶茶、凍可樂濕吓口，肚餓至點番個小菜，慢慢食、慢慢等！所以高峯期我哋閒閒哋日賣幾百杯奶茶、檸茶，真係笑住收錢。」
淫業好景時馬伕亦有豪客：「曾有個叫財哥嘅馬伕頭目，日花3,000元長包茶檔一張枱供旗下馬伕、妓女飲飲食食，十分豪氣。好多年前，有個初入行年輕馬伕一早嚟到，話搵到錢，要食好啲，點個鮑魚扒時蔬，結果要搵夥計去超市買罐裝鮑魚加料。𠵱家真係冇呢支歌唱啦！」