全國政協副主席霍英東追悼會日前舉行，政商界猛人雲集，陪霍老走最後一程嘅扶靈名單經過有關方面精挑細選，份量十足，包括董建華、許仕仁、陳佐洱、賭王何鴻燊、曾憲梓及李兆基等，當中，何鴻燊及李兆基是扶靈名單中少數商界代表。
賭王與霍老的恩怨情仇不用多說，但李兆基有份扶靈卻令人大惑不解。講開淵源，一齊過大海開賭場嘅鄭裕彤與霍老關係應該更密切，華華忍唔住要問，乜霍老同四叔好老友咩？
答案係，果然！翻查資料，81年國務院透過香港新華社請咗班大孖沙上京參觀，班商界人士見到國內同胞飽受文化大革命摧殘，深感教育重要，所以籌旗成立「香港培華教育基金」。
基金嘅發起人就係四叔，雖然當年嘅上京團霍老冇去，由霍震寰做代表，但後嚟講起培華，係人都話由四叔同霍老發起，原因係，82年中英開始為香港前途談判，當年英國首相戴卓爾夫人喺北京人民大會堂仆一仆，香港股、樓齊仆，唔少地產商都陷於破產邊緣，恒地當年股價跌至每股8毫（81年上市時股價接近4蚊），但四叔仍捐500萬（相當於現時5億元）畀培華，仲攞本募捐冊揼人心口，霍老知道後落力解囊，仲叫霍震寰做常務委員會主席。
募捐籌旗 互相幫忙
十多年前，霍老為咗支持番禺建設，搵四叔一齊開發洛溪新城同虎門渡輪。現時虎門渡輪由霍英東基金會管理，股東除咗霍英東基金會同恒基，仲有粵海集團同市政府。
當四叔要搵人捐錢，霍老自動解囊，相反霍老籌旗，四叔唔會托手踭，咁仲唔夠老友！
除咗齊齊捐錢做善事，2000年夏天，香港工商界搞咗個西部考察團，呢個團唔係曾特首帶團而係霍老做團長，但唔講唔知，副團長係四叔，中央駐港聯絡辦主任姜恩柱擔任顧問。
[email protected]