好鍾意迴轉壽司嗰種感覺，酒池肉林、擇肥而噬！最近佐敦開咗間4,000呎巨無霸級店舖嘅「天下壽司」，其30米「壽司食物鏈」，淨係睇吓都飽晒；以廿幾年廚齡日本老師傅坐鎮亦是必去趁吓嘅原因，創新嘅菜式來個法、意、韓及日大兜亂，連日本潮食「一口壽司」，都可以喺度食到！驚貴？日籍總廚OhamaMasahiro話：「$10碟三文魚壽司呢度都有做！」其實搵食都可以豐儉由人嘛！
記者：朱崇德
攝影：陳盛臣
由山林道、柯士甸道打落到佐敦道，都係搵食勝地，甚麼老字號、明星舖、韓日意法菜都有得食，間間細細哋又有特色！最近唔聲唔聲開間4,000呎巨型迴轉壽司舖，仲有日本總廚OhamaMasahiro把關，當然馬上踩場；一開口我都未叫「哦High唷」（早晨），佢劈頭第一句「你好！我都睇《蘋果》。」識講、聽、讀及寫流利廣東話，厲害！
70年代壽司已Fusion
食壽司鍾意追日本師傅，手法正宗、味道正統！「靚魚生，可以用錢買！好多港式舖頭，通病係壽司飯做得太軟、醋落得太酸！」OhamaMasahiro做咗廿幾年，「老司傅」猶記得用年半時間學煮飯，煮唔好倒咗唔少米、俾師傅打過無數次：「70年代，我喺大阪花村學做壽司，當時已經有將西式同中式做法混入壽司製作中；就好似由美國傳入嘅加州卷，我就係當時最早一批日本師傅學整。」壽司玩Fusion已經有相當歷史！
日日新返飛機貨
「香港嘅壽司係全世界最貴嘅！東京一件拖羅都係700日圓（約港幣$46），香港可以賣成$200！不過就地理環境同質素嚟講，我覺得係最好！有日本7、8成水準（差咗飛機運送時間），其他東南亞國家以至夏威夷同美國，都唔及香港好！」原來呢度日日有飛機貨返，到貨時間係每日傍晚5、6點，想食最新鮮嘢記得準時！「其實呢度定價我都覺得相當平！三文魚及玉子壽司都係$10碟，貴價啲嘅拖羅、日本馬肉、飛魚、池魚壽司都係$35，師傅特別推介鮮秋刀魚（$35），「香港唔係好多人做，有人嫌佢腥，我就覺得佢夠鮮！」據知係師傅嘅最愛，你話邊會整得唔好味呢！
日本新潮食「色彩繽紛」$105
阿廚話食壽司應該一口食晒，咁先嗒出真味！不過女士口較細，好辛苦啫！所以日本最近興起「一口壽司」，細細嚿好易嗒！6款一Set，「創作靈感由和菓子同西式小點引發而來」，日食文化除講味道，仲玩精巧色相，件件精巧趣致，令人食慾大增。
1.八爪魚惹味
八爪魚切幼粒，拌以沙律、日本芥辣，口感新鮮惹味；飯底以紅黃花染黃，更具特色。
2.口感清新
飯底照舊用紅黃花飯；頂上主食是甜蝦，加入西柚粒，令嚼下感覺更清新更Juicy。
3.健康之選
以貴價拖羅魚作魚茸，以鮮綠的菠菜包裹壽司飯；味道一重一輕，感覺好Balance。
4.酸甜香口
估唔到係最Heavy一嚿；黑糯米口感好重，香口的松子混入酸沙律汁，極引人食慾。
5.貴氣金箔
三文魚子加金箔，睇見已貴氣，難度分是將鱸魚緊包壽司飯，好考師傅手藝。
6.保留海水味
海膽Creamy又有海水味！配以青瓜、毛茄薄片，頓增清爽可口感覺。
法×日風情壽司$85
將壽司做到好似法國菜，有碟面擺設又瀨汁，有創意！三件壽司分別為章魚牛油果、三文魚黑欖同目魚西柚，由軟滑食到鮮甜；再加辣椒仔、日本芥辣同黑醋汁蘸着食，食法多變。
意×日火腿芝士卷$65
意大利Parma鹹火腿都可做卷物！配以羊奶芝士及香草，完全西菜風味；食到中間有大嚿青瓜，味道清香醒胃。
韓×日辣泡菜混吞拿魚卷物$25
好明顯有師傅首本的加州卷本色，不過改以辣泡菜拌魚生，好鍾意佢用沙律醬同鮮生果同食的感覺，能減辣加滑又順喉。
面燒雜錦魚生飯$35
壽司都嚟飯TASTIC，不過中間冇夾着食物，面放魚生、甜蝦、雜菜，最愛是佢同時落齊蟹子、魚子，排場十足，勁抵！
海膽魚子冷烏冬$35
對於我嚟講，魚子同海膽都只係一種點綴，個讚岐烏冬稔軟適中，佐食醬汁勁清甜，老實講句，其實我想齋食多碗烏冬。
搵食攻略
天下壽司（23761638）
地址：尖沙嘴柯士甸道122號麗斯中心UG全層
座位：80人
文通：佐敦道地鐵站D出口，左轉柯士甸道步行3分鐘
人均消費：$180
