張藝謀的《滿城盡帶黃金甲》同劉偉強的《傷城》都係排喺聖誕檔期上畫，呢輪兩部戲都展開好大宣傳攻勢，噚日《滿》片又有一款海報曝光，呢款海報係發哥同鞏俐嘅皇帝同皇后扮相。除咗香港同內地不斷加強宣傳外，發哥、鞏俐同張藝謀又去咗美國出席美國電影學院電影節之閉幕禮，佢哋部片係閉幕電影，啲飛一早賣晒，發哥同鞏俐都好重視呢個閉幕禮，所以專登飛去美國出席呢個頒獎禮。