鄭伊健、周麗淇、張智霖、方中信同內地女星霍思燕等，前晚喺觀塘出席新片《天行者》首映。霍思燕以大露背吊帶裙亮相，搶盡密實女主角周麗淇嘅風頭。
伊健啱啱喺泰國完成新劇宣傳工作，一返港即刻趕去首映禮。問佢請咗邊個嚟睇首映？伊健話：「我都未必睇得晒，一陣要返屋企執行李。」問佢點解女朋友唔嚟？伊健口快快答話：「唔得閒，要做嘢。」當指明女方係蒙嘉慧（YoYo）時，伊健即刻詐儍話：「請咗周麗淇，YoYo係邊個嚟？唔記得，好攰。」
前言不對後語
問到伊健首映翌日又要返北京拍劇，咁咪冇時間同YoYo見面？佢話：「冇呀，都唔得閒，一陣要返去瞓覺。」記者即反問伊健唔係要返去執行李咩？佢話：「啲行李喺北京。」問佢點解前言不對後語，佢就話：「真係好攰。」至於俾霍思燕搶盡風頭嘅周麗淇就話：「佢（霍思燕）一向係咁，我哋唔同style，如果我咁着嚇死你啦。」張智霖就透露靚靚袁詠儀就嚟生，但佢點都唔肯講BB嘅性別。
