天氣又涼又燥,見牙肉腫腫哋,想搵碗柴魚花生粥喫吓!去到甚麼連鎖粥舖、老牌粥店,啲職員都答:「白粥最下火!鹹瘦肉、皮蛋瘦肉都唔錯,就係冇柴魚花生!」粥舖老闆話,𠵱家粥舖多數淨做生滾粥,冇辦法,皆因香港人嘅口味成日轉,白粥做底、加料變乜都得,柴魚花生呢啲老火嘢,煲落就冇彎轉,賣唔晒就白蝕。
某日行經深水埗,竟然俾我發現有得食!$5碗好平,老闆朝朝晨咁早煲,非常老火又夠綿!不過佢就相當有性格,星期一、三、五、日賣皮蛋瘦肉粥;星期二、四、六就賣柴魚花生粥(好彩撞正雙日先有得食);老闆娘王太話:「呢度多數做街坊生意,十年嚟大家食慣晒!」傾談間,剛巧放學時間,有個小朋友撞入嚟:「姨姨我想食豆腐花!」隔籬鄰舍式小食店,就是多了一點關心、一份溫情!
記者、攝影:朱崇德
滋味屋
地址:深水埗醫局街195號B/C舖(近天后廟)