大市連續大升後，終於出現調整，恒指低開後再走軟，收市跌128點，成交仍好活躍，有489億元，獲利回吐壓力雖大，但承接力亦不弱。港股現時已由基金話晒事，相信調整幾日，又會再升過，今次個升市，可以升到你唔信，在形勢未有明顯轉壞之前，切勿造淡。
上升股（唔計認股證）超過300隻，大牛市小調整，仲會有好多股票接力而上，泰山石化（1192）就發力，高收0.57元，升4仙，升幅7.5%，成交就大增到3798萬股，而前日只係430多萬股。
去年2月中，泰山股價曾見0.96元，由於盈利表現未如理想，股價反覆回落，過去5個月，在0.5元至0.6元間橫行，噚日一支大陽燭抽上，一舉而突破4條（10日、20日、50日、100日）主要平均線，且有大成交配合，一升破0.6元，即可確認見底回升，開展大升浪，初步目標係年初的高位0.75元。
揸1年博升6成
泰山股價由高位回落，當然有因，05年（12月結）由於燃油價格急升，以及大舉擴充船隊令折舊增加，全年營業額104.6億元，大升兩倍，但盈利只得3.03億元，減少24%。06年上半年，營業額64.7億元，升82%，獲利6500萬元，大減74%，但去年同期有出售船舶所得收益1.38億元。
不過低潮已過，下半年開始，公司營運已重現佳景，盈利亦會顯著回升。
最重要嘅係，公司投下巨資，在廣東南沙經濟開發區的石油倉儲碼頭，最近已投入運作，向內地石油物流業務邁出一大步。除南沙外，位於福建泉州同上海洋山的倉儲設施亦興建中，前者明年初可運作，後者08年可竣工。全部完工後，集團的石油及石化倉儲量可達到500萬立方米，石油運輸、批發及分銷業務之間的協同效益將會大為提升。
下年度，泰山盈利有機會衝破04年的4億元，以PE10倍計，目標價係0.9元，1年預期升幅近60%，揸得過。
郭兆誠