全球機迷期待嘅PS3快將發售，香港不但極速引入行貨，更喺推出前班到部內部測試機畀傳媒試玩；《蘋果》梗唔放過，諗爆頭誓要試盡所有機能，始終「富貴套餐」成五千幾蚊唔係平，究竟畫面有幾靚？功能又幾勁？乜Game可慳番唔使買？筆者面對測試機就如舞弄一件大玩具，雀躍之情簡直等同PS3散發出嘅熱力一樣，連溫度計都測到爆錶！
記者：徐影龍
攝影：伍慶泉
雖然外國及日本不少傳媒，較早前已有實機安排測試，香港傳媒只屬「遲來的春天」，不過喺香港遊戲試機史上已破晒紀錄！上星期發布會只可「遠觀」，今勻近距離接觸果然不同凡響；首先係筆者本極討厭60GB版嘅銀色邊框，但實際玩落，發覺銀面反光效果跟黑色鏡面機身相輔相成，一啲都唔覺「娘」。最大問題係全機極為黐塵同黐手指模，影到攝影師眼到凸埋，抹都抹到手軟！但全鏡面機身真係睇到如癡如醉，令人又愛又恨！
USB比想像更實用
SONY踢走手掣、記憶卡插槽，連i.LINK都唔要，機前獨沽一味只有四組USB；手掣用無線、遊戲Save有硬碟，精簡後落得舒服順眼，但齋玩USB，到底兼容性有幾強呢？筆者搵嚟多款電腦用嘅USB周邊，睇吓PS3消化能力；先係Logitech無影手滑鼠同鍵盤，免Driver一插即用，「英數符」輸入完全啱位，上網、玩Chat毋須苦等PS3專用型號。第二試駁iPodnano，不論AAC或MP3音樂一律照播無誤，連同事嗰部國產Cheap機一樣Support！較失望係除官方出嘅EyeToy鏡頭外，其餘WebCam均告失靈，日後想玩視像通話，相信要買定套EyeToy。最後測試RAM卡同Reader，雖然PS3全部都認到，但不能直接播片同聽歌，跟PSP一樣，檔案存放要跟足特定Folder，即係用之前最好搵PS3格式化一次，再按名稱放入唔同種類嘅多媒體File，咁就實食無黐牙！
上網睇中文Pass
玩完機身Port位，輪到實際操作。介面一如E3及TGS示範般，由PSP上進化而成，一大堆功能及設定安排得好順手，打機、電影、音樂及上網等分門別類，毋須傷神搵出某項功能，玩慣PSP機迷倍添親切。雖然SONY未開放Online平台，試唔到ChatRoom、網上商店等服務，不過上網則完全無問題。筆者例牌先以「蘋果網」測試，繁體中文顯示全部過關，排列亦無走位，連Flash廣告都兼容，唯一問題係Loading極慢！多次60秒Timeout而終止，相反上YouTube就順暢得多，隨手Click短片均可即播，而且流暢唔窒格！由於可用鍵盤及滑鼠操作，入網址、Click超連結等都好方便，最不滿係不設任何中文輸入法，上Google搜尋都幾麻煩。
值得一提係「InstallOtherOS」擺明已為Linux鋪路，想起喺PS3上打PCGame、執相已夠過癮，實用性絕對可無限延伸。
兼容XBOX!?
首批Game邊隻買得過？
《RidgeRacer7》：唯一支援六軸及1080p
$370
推薦度：80%
11月17日跟PS3同步推出行貨嘅遊戲，論期待度肯定非《RidgeRacer7》莫屬，除咗愈見進步嘅3D模型及出色程式編寫外，亦係現場唯一支援1080p全高清輸出嘅遊戲，玩開PS2嘅機迷肥榮未正式埋位玩，已被其高解像畫面嚇窒，用SiXAXIA手掣嘅六軸功能玩亦係一個全新體驗，Fing吓手掣就可掟彎甩尾，頭搖又尾擺咁玩個不亦樂乎！
雖然公關大員話係Demo碟，「只准」玩Arcade及VS模式，不過眼見所有模式及功能均已Unlock，包括Online及靈魂模式RidgeStateGrandPrix都唔畀玩！想一試系列最大突破嘅買零件及改裝系統都唔得，惟有等正式版啦！
《高達：鎖定目標》：消磨意志良品
$370
推薦度：0%
本來滿懷期望一試呢款史上最真實嘅高達遊戲，可惜玩落實在慘不忍睹，機體偷格情況超嚴重、戰場刁零冇乜建築物，感覺空虛，絲毫沒有激烈嘅戰爭感覺！試勻都冇LockOnTarget，一味被敵人掃射，超辛苦過到第一關，已提不起勁再玩落去。畫面的確好靚好真實，不過只可以用無靈魂嚟形容！白白浪費了PSP版《高達》嘅口碑。
《源氏：神威奏亂》：鬼武者重現PS3
$370
推薦度：65%
玩落發覺呢隻Game充滿《鬼武者》味道。當然製作人同為CAPCOM嘅岡本吉起有關，由場景、武器到BGM均十分相像，大可喺《新．鬼武者2》推出前止住渴先！畫面可用無懈可擊形容，起首一幕火場廝殺已夠扣人心弦，連影音發燒友David望見都禁不住大讚「啲火好有層次！」動作可算比《鬼武者》豐富，連續技亦算多變化，雖不設令人着迷嘅「一閃」系統，取而代之係神威發動，跟住畫面㩒掣便可使出威力強大必殺技，絕對夠爽快，整體比PS2版跳升幾級！
Game書編輯有讚有彈
PS3在港有得試玩，梗唔少得一班Game書老編講吓實試感受，當中話唔定有你追開嘅偶像編輯，為大家買機作一盞指路明燈。
淙流（跨傳媒遊戲雜誌總監）
ν：定價全球最平最抵讚啦，而且行貨維修方面毋須擔心，唔似水貨壞起上嚟真係有排搞。
Ｘ：Online平台唔夠完善，Mic記Live一站式好啲，首批唔夠大作遊戲都係弊病。
小白《GameWatch》
ν：有保養好緊要，尤其咁高科技嘅主機。畫面真係無敵，好期待SCE隻《白騎士物語》。
Ｘ：擔心Online收費又貴又亂，而PS3下載舊有PS遊戲，亦間接鼓勵廠商不斷食老本。
Joe《GameWave》
ν：PS3比Blu-ray播放機平一半，點計都抵。Online有對戰、通訊同下載遊戲，幾豐富。
Ｘ：任記Wii氣勢強勁，擔心SONY冇咗昔日大量廠商支援優勢，更擔心Online服務質素。
阿鈞《FAMI通PS2》
ν:畫面好靚，大廠支援亦算多，好多名牌系列將繼續喺PS3度出續集，絕對係至強優勢。
Ｘ：相信大部份人仍以普通AV線輸出至普通電視，高清優勢唔明顯，頭炮遊戲太少喇。
朱先生《G-Zone》
ν：以機能計，賣價算好吸引，而且好多大廠都會喺PS3上出遊戲，唔怕冇正Game玩。
Ｘ：頭批遊戲得三款，唔及XB360初賣時氣勢咁強，而且機迷明顯唔接受其Online形式。
四哥《GameNext》
ν：都係覺得畫面好突出、好靚，行貨定價已令人投信心一票，只望香港能努力爭取貨源。
Ｘ：首批機驚唔太穩定有鑊氣，而且遊戲唔吸引，對Blu-ray亦無甚興趣。
現場評估
PROFILE（行貨）
主處理器：Cell（1+7核心架構）
主記憶體：256MBXDR
圖像處理器：RSX
視像記憶體：256MBGDDR3
光碟機：藍光＋紅光雙雷射頭
支援光碟：BD、DVD、SACD、CD、PS/PS2遊戲
影像輸出：最高1080p全高清（HDMI/色差）
音效輸出：DD5.1、dts5.1、LPCM7.1
硬碟：60GBSATA（2.5"）
通訊：Ethernet、Wi-Fi、藍芽
體積：32.5×98×274mm
重量：5kg
明日預告：老行尊周公狠評Blu-ray
今日同大家試盡PS3嘅功能同打機表現，聽日就輪到另一重頭戲
──Blu-ray實試，《蘋果》更搵嚟長駐幾本雜誌寫影音專欄嘅周公出鏡，評盡PS3嘅影音表現，戲迷密切留意！