近日連場爆冷戰果，熱門球隊捧場客頻呼：「有冇搞錯！」勝敗乃兵家常事，世上沒有長勝不敗之師，就算你賭波方面，有里昂、「車仔」等強勁級數，都有損手之日；最緊要識得賽後檢討，以及定出明確目標，方有收回今日失地之時。
最好做埋賽後檢討
周三晚德乙聯，坦白講未睇過科隆今季喺乙組踢成點，有咩人都未必知，但見該隊喺當晚主場接戰奧厄之前，於所有賽事主場勝率，已因近期頻和波，回落到剛好50%，按理已有回升空間；奧厄此前客場聯賽5戰只得1場有分落袋，科隆W實值出擊。結果，奧厄贏1:0，呢1注賀咗佢哋打開今季客場聯賽勝利之門。
好似輸得有點不明不白，或者話就算贏，都其實係不明不白，擺明係純粹睇數據玩呢個遊戲。但要記得將呢1注，寫番落本「死亡筆記」，旁註科隆下次主場賽日「11月19日主場對1860慕尼黑」，到時平注，或添注再嚟過。
眼睇唔少波友，好多時就係無做賽後檢討，明明信心十足，認定某球隊「反底」在望，結果某球隊的確喺三、兩場之內「反底」；不過輸完1注後，無搵方法擺上心，又放眼其他場次及隊伍，平白錯失唔少良機。其實𠵱家資訊發達，未必再係莊家贏晒，叻過所謂操盤手、懂得捉路嘅波友大有人在；只不過係人哋專業啲，有齊各樣工具去檢討各場盤口得失。今日開始整番本賽後筆記，球季尚漫長，大把機會畀你收復近日失地。文：華度