港股反覆上升多時，昨日終於出現「遲來的調整」，但恒指跌幅只係128點，大市成交縮咗，但恒指成份股嘅交投就增加，日線圖技術指標有轉淡嘅勢，但係就未變壞，條10日線升到上18573，如果恒指真係下試嗰條線，就係大好收集嘅機會（呢句話係同冇貨又等緊買貨嘅投資者講嘅）。
個市喺下晝插落嚟，其實冇乜壞消息，如果話有，咁就係美國人喺中期選舉摑咗布殊一巴，話佢嘅伊拉克政策唔啱，仲成日講大話，又虐待啲囚犯，因為點咗票嘅州頗多，布殊大勢已去，將會失去國會嘅控制權，州長選舉超過一半由民主黨人勝出，如果民主黨變成國會揸fit人，布殊政府就變咗「跛腳鴨」政府，中東政策會點？東亞政策會點？國內嘅稅務政策同埋美元去向會點？都會畀人話唔明朗，對市場嚟講，乜嘢叫做「唔明朗」？就係話可以造淡，因為基金最怕不明朗因素，所以，昨日已經有人講美股昨晚會跌，係唔係咁，好快就知。不過，借勢嘅嘢，點都要回歸現實，港股借勢回吓，對後市應該仲好。
招行C輪9075：招行（3968）昨日報收12.98元，跌咗1.2%，大勢唔曳，都係跟住個大市跌，收市前啲買盤好勁，由12.88元低位掃番轉頭，靠近保歷加通道頂「陀螺」收市。外資下個月就可以進軍國內，國內銀行股面對多啲競爭，但同時又多咗同外資銀行合作嘅機會，招行仍會炒上去，短中線睇15元。隻C輪9075昨收1.53元，槓桿8.5倍（有效6.3倍），對沖值0.74，正股升上15元，9075應該喺3.1元樓上，就算升到14元有阻力，隻輪都會見到2.3元，正股跌穿12.5元止蝕。
俊樺