特首選舉委員會界別分組選舉，提名已如火如荼，金融界界別將會選出12個代表，已遞交申請表嘅有10位，唔少係重量級賓架，當中獅子銀行同中銀香港最多，包括銀行界「梁朝偉」王冬勝、恒生大班柯清輝，中銀香港共三人參選，分別為副總裁林炎南、副總裁兼財務總監李永鴻，總經理兼全民黨主席盧重興。
華華又側聞，仲有一位賓架啱啱交咗選委申請表，呢位仁兄曾經同寶哥哥拗過手瓜，出戰立法會金融界代表一席，相信選委會個網站喺一兩日內會update到佢嘅資料。其他尚有大新金融主席王守業、亞洲金融執董陳智文、集友銀行高層陳耀輝、大生銀行董事馬清煜等，名單中亦赫然發現長實副董事總經理葉德銓嘅名字，估計佢報名金融界別，可能循長實持有經絡按揭轉介嘅途徑有關。