恒指噚日終於結束6日升勢，收報18811點，跌近130點。今次跌市主要受中移動（941）拖累，其股價急跌近2元，足以令恒指下挫115點。
即使係咁，唔少網友並唔覺得短期內有大調整，因為現時大部份藍籌股跌幅輕微。不過，出奇嘅係，招商局國際（144）及電盈（008）逆市大升，分別勁升6%及7%。
《香港討論區》網友longdragon指，早前招商局每日都跌少少，即使其他港口股升幅顯著，如大連港（2880），但佢都唔升；當港口股下挫時，佢又不能幸免，覺得此股相當不濟，對佢冇晒信心。點不知大行剛發出研究報告唱好佢，股價立即嚟個急速反彈，令唔少散戶感到驚訝，網友話：「我都等咗幾日，招商局終於開車，真係好彩，有啲運，不過唔會長揸，諗住趁高位沽。」
望領電盈走出谷底
至於電盈急升，唔少網友認為同李嘉誠基金入股有關，仲話李氏家族隨意操控電盈股價，揚言「佢兩父子打龍通」。有趣嘅係，噚日是李澤楷生日，有網友估佢老竇想同佢慶祝生日，所以故意將電盈股價托高，當係送畀阿仔嘅生日禮物。
雖然呢件事未得到證實，但起碼引起唔少網友對小小超生日同電盈股價嘅遐想。中國網通（906）亦因而受惠，股價升近4%，網友相信佢亦係時候開車，並且作為電盈大股東，會帶領電盈走出谷底。