工商銀行（1398）上月底以3.07元掛牌，啱啱夠兩星期。上市翌日最低見3.45元，之後穩步上揚，星期一最高升到3.65元，回咗兩日，噚日又再嚟料。趁住今日被納入「大摩中國A股指數」系列，同埋下星期一被列入「大摩標準指數」系列，噚日基金買盤源源不絕，收市升7仙，收報3.63元，係上市以嚟最高收市價，散戶正期待隻股速速爆升。
《香港討論區》網友cy36hk開咗條thread：「相信1398短期爆升將開始，大家睇位啦……我覺得佢會借入指數炒一炒上去出貨，因為之前未炒過。但如果今明兩日過唔到3.65會先走……不過大家都唔好期望短期大升，我最多睇到3.8。」
johnkwan對隻股唔敢寄厚望：「聽聞班大帝分得唔多，所以齊齊玩壓價，唔畀散戶賺咁多。」
wympeter亦對「爆升」有保留：「爆升不易，Size太大。」
機構投資者趁低吸納
工行係內地四大國有商業銀行之首，香港H股公開招股時，申請認購人數係歷來最多，凍結資金亦創香港IPO最高紀錄，引起國際哄動。隻股現價PE24.9倍，預期06年每股盈利15仙，預測PE24.2倍，P/B約2.64倍，雖然貴過本地銀行股嘅平均估值，但同目前喺香港上市嘅其餘4間內地銀行股比較，估值大約係中位數。內地銀行股較本地銀行股估值有溢價，係可以理解嘅，根據證券機構預測，以目前內地經濟增長環境，內地銀行股今年盈利增長幅度會遠遠高過本港銀行股，而且業務可以拓展嘅空間亦遠勝本港銀行股。工行兼具中資概念同龍頭概念，自然睇高一線。
工行上市時唔夠派，好多機構投資者未買齊貨，相信短期內會繼續吸納。圖表上，自周一創上市高位後，經過兩日調整，噚日確認再展升浪，一旦突破3.65元，上望4元。
余文