吉利汽車（175）好巴閉，搵到英國嘅百年老店錳銅控股，喺上海搞合資公司「英倫帝華」，繼續獨沽一味生產黑色的士，大概08年中投產，但唔會賣返米字旗老家，只會考慮向內地或海外銷售！
MBH嘅財務董事MarkFyber話，上海嚟緊有4萬部的士夠期更換，個市場應該可以發到好大喎。唔講唔知，英國嘅的士一部賣成3萬英鎊，約44萬港紙，賣得咁貴皆因成本都佔咗七成，但市場就話合理價應該係萬五英鎊，真係各說各法。
吉利嘅主席李萬福仲話，英國所有車廠全部死晒，剩番MBH撐到家吓就知唔簡單，班管理層應記一功，所以佢哋根據換股協議之後，佔MBH23%股權，做埋大股東，只會派2個非執董入局，唔會亂搞，因為人哋嘅世紀技術先係最值錢喎。