美國中期選舉雖已塵埃落定，但選舉結果相信仍係唔少人茶餘飯後嘅熱門話題。不過，在《MSNBC》討論區中，有網友認為政治話題敏感，質疑係咪應該禁止同事係工作場所發表政治偉論，以免同事掛住爭拗唔做嘢，浪費公司資源，影響生產力。
最好適可而止
Devy回應話，宗教同政治都唔應該喺屋企以外嘅地方討論，因為呢類話題最易引起爭拗，有時言論過激，仲可能會有人身攻擊，將職場變成另類戰場。
其實除咗辦公室政治外，JimHolland亦贊同，政治爭論只會令不同政見的員工出現分化，大大降低工作效率。
網友ibsteve2u就話，除非你嘅政見同上司一致，否則都係少說為妙，因為當你同上司政治立場唔同，但又要同佢哋拗嘅話，通常都只會有兩種結果：其一是佢哋覺得你無腦，並私下取笑你蠢，咁升職自然唔會有你份；其二是你太醒，獨特嘅政治見解與智慧令佢哋產生不安，甚至無地自容，結果就係你一樣唔使旨意升職。
Quantum50嘅意見比較中肯，佢覺得要按個別情況而定，如果可以喺冷靜融洽嘅工作環境下，同事之間交流一下無妨，咪當增進彼此了解囉，根本毋須忌諱，但要適可而止，一發覺唔多對路，就要立即終止話題，以免不容異見的人士動口又動手﹗