早輪話傾緊發展內地殯儀業務嘅嘉利盈（8029）噚日終落實首宗收購，用1150萬買咗喺香港搞殮葬服務嘅祥盛同埋相關物業，正式變身為殯儀企業。基於幫襯服務嘅人都唔想返轉頭，亦唔會四圍格價，資訊唔流通……業務利潤自然好深。
不過，祥盛呢間公司喺舊年7月先開業，今年6月底淨虧損30萬，撇除股東貸款170萬，收購嘅溢價成370萬；另外又攞640萬買咗祥盛𠵱家佔用嘅物業，所以嘉利盈噚日股價反而跌咗。
之但係嘉利盈對殯儀業前景仍十分樂觀，仲引用政府統計署資料，話香港65歲或以上人口，佔全港人口比例由02年11.4%，升至06年的12.2%；港府成立嘅人口政策專責小組估計，到2031年，比例升至四分之一。
至於死亡個案，由02年34300宗升至05年約38800宗，其間香港殯儀服務公司開多咗一倍，去到80間，有晒數據證明行業前景明朗，投資可受惠於行業增長云云。若果屋企上有高堂，買呢間公司唔知會唔會大吉利是！